අමෙරිකාවේ පවතින දරුණු ලැව්ගිනි හේතුවෙන් සිදුව ඇති මරණ සංඛ්‍යාව 16ක් දක්වා ඉහළ ගොස් ඇති බව විදෙස් වාර්තා සඳහන් කරනවා.
ඊයේ (11) සවස, ලොස් ඇන්ජලිස් ප්‍රාන්ත මරණ පරීක්ෂක කාර්යාලය නිවේදනය කළේ මෙම මරණවලින් මරණ 11ක් ඊටන් ගින්නෙන් සහ පහක් පලිසේඩ්ස් ගින්නෙන් සිදුව ඇති බවයි.
එමෙන්ම තවත් පුද්ගලයින් 13 දෙනෙක් අතුරුදන්ව ඇති බවයි තොරතුරු වාර්තා වන්නේ.
මේ අතර පැතිර යන ලැව්ගින්න තවත් සතියක පමණ කාලයක් යනතුරු පැවතිය හැකි බවට එරට බලධාරීන් අනතුරු අඟවා තිබෙනවා.
ඒ, ඉදිරි දිනවලදීත් තද සුළං ඇති විය හැකි බවට පුරෝකථනය කර ඇති පසුබිමකයි.
ලොස් ඇන්ජලීස් බලධාරීන් දැනට නගරය වටා ඇති ප්‍රධාන ලැව්ගිනි හතරක් පාලනය කරමින් සිටිනවා.
එහි විශාලතම ගින්න වන්නේ පැලිසේඩ්ස් ගින්නයි, එය 11% ක් පාලනය කර ඇති අතර එය අක්කර 23,654ක් පුරා පැතිරගොස් ඇති බවයි වාර්තා වන්නේ.
දෙවන විශාලතම ගින්න වන්නේ පසඩෙනා අවට පැතිරයන ඊටන් ගින්න වන අතර, එය අක්කර 14,118ක් දක්වා පැතිර ගොස් තිබෙනවා.
ඉන් 15% ක් පාලනය කර ඇති බවයි ලොස් ඇන්ජලීස් බලධාරීන් පවසන්නේ.
කෙනත් ගින්න අක්කර 1,052ක් දක්වා පැතිර ගොස් ඇති අතර, 90%ක් එය පාලනය කර ඇති ඇති බව සඳහන්.
අක්කර 799ක් පුටා පැතිර ගොස් ඇති හර්ස්ට් ගින්න 76% ක් පාලනය කර තිබෙනවා.
මේ අතර මෙක්සිකානු ගිනි නිවන භටයින් ද ලොස් ඇන්ජලිස් හි පැතිර ලැව්ගිනි නිවීම සඳහා සහාය වීමට පැමිණ ඇති බවයි විදෙස් මාධ්‍ය වාර්තා කරන්නේ.
පැලිසේඩ්ස් ගින්න පැතිරීම නැවැත්වීමේ උත්සාහයක් ලෙස ගිනි නිවන ද්‍රව්‍ය ගුවනින් හෙළමින් සිටින බවයි වාර්තා වන්නේ.
එය දැමූ ස්ථානය කාර්ය මණ්ඩලයට දැනගැනීම පහසුවීම සඳහා එම ද්‍රව්‍ය දීප්තිමත් රෝස පැහැයෙන් වර්ණාලේප කර තිබෙනවා.
