වහල මත සවි කර ඇති සූර්ය පැනල තාවකාලිකව ක්‍රියා විරහිත කරන ලෙස ලංකා විදුලිබල මණ්ඩලය ඒවායේ හිමිකරුවන්ගෙන් ඉල්ලා සිටියා.
ඒ, අනුව අද (13) සිට එළඹෙන 21 වනදා දක්වා දිවා කාලයේ සෑම දිනකම පස්වරු 3.00 දක්වා සූර්ය පැනල ක්‍රියා විරහිත කර තබන ලෙසයි ඉල්ලා සිටින්නේ.
උත්සව සමය තුළ විදුලි ඉල්ලුම අවම මට්ටමකට පහත වැටී ඇති බැවින්, ජාතික විදුලි බල පද්ධතියට එක් කෙරෙන ඉහළ විචල්‍යතාවයකින් යුතු පුනර්ජනනීය බලශක්ති දායකත්වය ජාතික පද්ධතියට අසාමාන්‍ය ලෙස ආතතියක් ඇති කරන බවයි එම මණ්ඩලය පවසන්නේ.
විදුලිබල මණ්ඩලය වැඩිදුරටත් සඳහන් කළේ එහි ප්‍රතිඵලයක් ලෙස පද්ධතියේ අවස්ථිතිය තියුණු ලෙස පහත වැටී ඇති බවත්, ඊට ඉතා සුළු උච්චාවචනයකදී පවා අර්ධ වශයෙන් ඇනහිටීම් හෝ රට පුරා විදුලිය විසන්දිවීමක් ඇති කළ හැකි අවදානමක් පවතින බවයි.
ඒ, හේතුවෙන් මෙම කාල සීමාව තුළ ජාතික විදුලි බල ජාලයේ ස්ථාවරත්වය පවත්වා ගැනීම සඳහා වහල මත සවි කර ඇති සූර්ය පැනල තාවකාලිකව ක්‍රියා විරහිත කර තබන ලෙසයි දැනුම් දී ඇත්තේ.
