ඇමරිකානු හිටපු එෆ්.බී.අයි ඉහළ නිලධාරියකු ශ්‍රී ලංකාවේ ව්‍යාපාර සංචාරයක් අවසන් කර නැවත ඇමරිකාවට පැමිණි අවස්ථාවේ අත්අඩංගුවට ගෙන තිබෙනවා.
චාල්ස් මැක්ගොනිගල් නැමැති මෙම හිටපු එෆ්.බී.අයි නිලධාරියා එරටට පැමිණි අවස්ථාවේ දී එෆ්.බී.අයි නිව් යෝර්ක් ක්ෂේත්‍ර කාර්යාලය විසින් අත්අඩංගුවට ගෙන ඇති බවයි විදෙස් මාධ්‍ය වාර්තා කළේ.
රුසියානු බිලියනපතියකු වන ඔලෙග් ඩෙරිපස්කා සමඟ සබඳතා පැවැත්වීම සම්බන්ධයෙන් මොහුව මෙලෙස අත්අඩංගුවට ගෙන ඇති බවයි වාර්තා වන්නේ.
ඇමරිකානු එක්සත් ජනපදය විසින් ඔලෙග් ඩෙරිපස්කාට එරෙහිව සම්බාධක පනවා ඇති රුසියානු ජාතිකයෙක් වනවා.
ඒ අනුව පනවා ඇති සම්බාධක උල්ලංඝනය කිරීම හේතුවෙන් චාල්ස් මැක්ගොනිගල් මෙලෙස අත්අඩංගුවට ගෙන ඇති බව සඳහන්.
චාල්ස් මැක්ගොනිගල් ශ්‍රී ලංකාවේ ව්‍යාපාර සංචාරයක් අවසන් කර පසුගිය (21) වැනිදා ජෝන්.එෆ් කෙනඩි ජාත්‍යන්තර ගුවන් තොටුපොළ පැමිණි අවස්ථාවේ දී මෙලෙස අත්අඩංගුවට පත්ව තිබෙනවා.
අනතුරුව ඔහු මැන්හැටන් අධිකරණය හමුවට පසුගිය 23 වනදා ඉදිරිපත්කර ඇති අතර, එහිදී ගොනුකර තිබූ චෝදනා හතර සඳහා තමන් නිවැරදිකරු යැයි ප්‍රකාශ කර ඇති බව සඳහන්.
එහිදී ඔහුට ඇමෙරිකානු ඩොලර් ලක්ෂ 05ක බැඳුම්කරයක් ඇපලබා දීමටත් සංචාරක සීමා පැනවීමටත් විනිසුරුවරයා විසින් නියෝග කර තිබෙනවා.
එමෙන්ම චාල්ස් මැක්ගොනිගල්ට ඔලෙග් ඩෙරිපස්කා මුණගැසීම ද තහනම් කිරීමටයි නියෝග කර ඇත්තේ.
