වංචනික ලෙසට සකස් කළ කැනඩා විදෙස් ගමන් බලපත්රයකින් ශ්රී ලංකාවට ඇතුළු වී එංගලන්තය බලා යාමට පැමිණි චැඩ් ජාතික ගුරුවරයෙකු අත්අඩංගුවට ගෙන තිබෙනවා.
ඊයේ සවස කටුනායක ගුවන් තොටුපොළ පැමිණීමේ පර්යන්තයේ දී ආගමන විගමන නිලධාරීන් විසින් අත් අඩංගුවට ගත් මෙම පුද්ගලයා යළිත් ඔහු පැමිණි කටාර් රාජ්යය වෙත පිටුවහල් කර ඇති බවයි අප වාර්තාකරු සඳහන් කළේ.
31 හැවිරිදි මෙම පුද්ගලයා සෞදි අරාබියේ අරාබි භාෂාව උගන්වන චැඩ් ජාතික ගුරුවරයෙක්.
ඔහු ඊයේ සවස 04.30ට දෝහා සිට පැමිණි කටාර් ගුවන් සේවයේ QR – 654 දරන ගුවන් යානයෙන් කටුනායක ගුවන් තොටුපොළ වෙත පැමිණ තිබුණා.
අනතුරුව ඔහු නිශ්කාශන කටයුතු සඳහා ගුවන් තොටුපොළ පැමිණීමේ පර්යන්තයේ ආගමන විගමන නිලධාරී කවුළුව වෙත තම කැනඩා ගුවන් ගමන් බලපත්රය ඇතුළු අනෙකුත් ලියකියවිලි භාර දී තිබෙනවා.
එහිදී මෙම ගුවන් ගමන් බලපත්රය ප්රමිතියකින් තොරව සකස් කර ඇති බවට එහි සේවය කළ නිලධාරීවරයාට සැකයක් මතුවීම හේතුවෙන් චැඩ් ජාතික ගුවන් මගියා සහ ඔහු ඉදිරිපත් කළ ලියකියවිලි ප්රධාන ආගමන විගමන නිලධාරීවරයා වෙත යොමු කර ඇතැයි සඳහන්.
එහිදී සැකකරුගෙන් කළ ප්රශ්න කිරීම්වලදී ප්රකාශ කර ඇත්තේ තමන් චැඩ් ජාතිකයෙකු බවත් මෙම ගුවන් ගමන් බලපත්රය තම සහෝදරයෙකු විසින් සකස් කර දුන් එකක් බවයි.
තමන් මෙලෙස ශ්රී ලංකාවට පැමිණ දින 05කට පසුව එංගලන්තය බලා පිටත්ව යාමට සැලසුම් කර ඇති බව ද මෙම චැඩ් ජාතිකයා වැඩිදුරටත් අනාවරණය කර තිබෙනවා.
ඒ අනුව මෙම චැඩ් ජාතිකයා අත් අඩංගුවට ගත් ආගමන විගමන නිලධාරීන් ඔහු පැමිණි කටාර් රාජ්යයේ දෝහා වෙත පිටුවහල් කිරීම සඳහා කටාර් ගුවන් සේවයේ නිලධාරීන් වෙත භාර දී ඇති බවයි අප වාර්තාකරු සඳහන් කළේ.
