ඉන්දීය ක්රිකට් ක්රීඩක රිෂාබ් පාන්ට් රිය අනතුරට ලක්වීමෙන් පසු ඔහුගේ ජීවිතය බේරාගත් තරුණයා වස පානය කර සියදිවි හානිකර ගැනීමට උත්සාහ කර තිබෙනවා.
සිය පෙම්වතිය සමඟ වස පානය කර ඔහු මෙලෙස සියදිවි හානිකර ගැනීමට උත්සාහ දරා ඇති බවයි ඉන්දීය මාධ්ය වාර්තා කළේ.
25 හැවිරිදි වියේ පසුවන රජත් කුමාර් නැමැති මෙම තරුණයා සිය 21 හැවිරිදි පෙම්වතියවන මනු කාශ්යප් සමඟ වස පානයකර ඇති අතර එහිදී ඔහුගේ පෙම්වතිය මියගොස් තිබෙනවා.
රජත් කුමාර් තවමත් බරපතළ තත්ත්වයෙන් රෝහල් ගතව ප්රතිකාර ලබන බවයි ඉන්දීය මාධ්ය වාර්තා කළේ.
කුල වෙනස්කම් හේතුවෙන් ඔවුන්ගේ සම්බන්ධයට පවුල්වලින් එල්ල වූ විරෝධතා මත මෙම තීරණය ගෙන ඇති අතර, වස පානය කිරීමට පෙර වීඩියෝ පණිවුඩයක් ද තබා ඇති බවයි වාර්තා වුණේ.
“අපිට එකට ජීවත් විය නොහැකි නම්, අඩුම තරමින් එකට මිය යා හැකියි” යනුවෙන් ඔවුන් දෙදෙනා එම වීඩියෝ පණිවුඩයේ සඳහන් කර තිබෙනවා.
උත්තර් ප්රදේශ් හි මුසෆර්නගර් හි උක් වගාවක දී වස පානය කිරීමට පෙර ඔවුන් දෙදෙනා එක්ව මෙය පටිගත කර ඇති බවයි අනාවරණය වී ඇත්තේ.
පසුගිය 2022 වසරේ දෙසැම්බර් මාසයේ දී රජත් කුමාර් තම මිතුරා වන නිෂු කුමාර් සමඟ එක්ව ක්රිකට් ක්රීඩක රිෂාබ් පාන්ට් මුහුණ දුන් බිහිසුණු මෝටර් රථ අනතුරෙන් පසු ඔහුව බේරාගැනීමත් සමඟ ඉන්දියාව පුරා අවධානය දිනාගත් චරිතයක් වුණා.
රිෂාබ් පාන්ට් දිල්ලියේ සිට උත්තරාකන්ඩ් දක්වා ගමන් කරමින් සිටිය දී ඔහුගේ මර්සිඩීස් රථය අනතුරට පත්ව ගිනි ගැනීමකට ලක් වුණා.
එම අවස්ථාවේ දී අසල කර්මාන්ත ශාලාවක සේවය කළ රජත් සහ නිෂු අනතුර දැක එම ස්ථානයට දිව ගොස් ඔහු කවුදැයි නොදැන, තුවාල ලැබූ ක්රිකට් ක්රීඩකයා දැවෙන සුන්බුන් එළියට ගෙන වෛද්ය ආධාර ලබාදීමට කටයුතු කර තිබුණා.
