ජපානයේ රැකියා ලබාදෙන බව පවසා මුදල් ලබාගත් පුද්ගලයෙකු ව සහ වලංගු බලපත්‍රයක් නොමැති ව ව්‍යාජ විදේශ රැකියා නියෝජිත ආයතනයක් පවත්වාගෙන ගිය අයෙකු ව විදේශ සේවා නියුක්ති කාර්යංශයේ නිලධාරීන් විසින් අත්අඩංගුවට ගෙන තිබෙනවා.
අප ප්‍රාදේශීය වාර්තාකරු පැවසුවේ අද දහවල් මෙම අත්අඩංගුවට ගැනීම් සිදු කර ඇති බවයි.
ජපානයේ රැකියා ලබාදෙන පවසා තමන්ගෙන් රුපියල් 9,35,000 ක මුදලක් ලබාගත් නමුත්; මේ වන තුරු රැකියාව නොලැබුණු බවට වන පැමිණිල්ලක් මතයි විදේශ සේවා නියුක්ති කාර්යංශය සිය විමර්ශන ආරම්භ කර ඇත්තේ.
ඒ අනුව මුදල් ලබාගත් බව කියන නුවරඑළිය – කදපොල ප්‍රදේශයේ පදිංචි පුද්ගලයෙකු අද විදේශ සේවා නියුක්ති කාර්යංශයට කැඳවා ප්‍රශ්න කර තිබෙනවා.
එම අවස්ථාවේදීයි අදාළ සැකකරු ව අත්අඩංගුවට ගෙන ඇත්තේ.
මේ අතර,කටුනායක – ඩබ්ලිව්.ඒ ද සිල්වා මාවතේ පවත්වා ගෙන ගිය ව්‍යාජ විදේශ රැකියා නියෝජිත ආයතනයක් ද ඊයේ විදේශ සේවා නියුක්ති කාර්යංශයේ නිලධාරීන් විසින් වටලනු ලැබුවා.
එම ස්ථානයේ තිබී විදේශ ගමන් බලපත්‍ර 20 ක්, රැකියා ලබාදීමට අදාළ ලිපි ගොනු 31 ක් සහ රැකියා අයදුම්
පත්‍ර 05 ක් ද වැටලීම කළ නිලධාරීන් තම භාරයට ගෙන තිබෙනවා.
එම ව්‍යාජ විදේශ රැකියා ස්ථානය පවත්වාගෙන ගිය බව කියන මීගමුව – දළුපොත පදිංචිකරුවෙකු ද විදේශ සේවා නියුක්ති කාර්යංශයේ නිලධාරීන් විසින් අත්අඩංගුවට ගෙන ඇති බවයි වාර්තා වන්නේ.
අත්අඩංගුවට ගෙන ඇති සැකකරුවන් මාලිගාවත්ත සහ මීගමුව මහේස්ත්‍රාත් අධිකරණ වෙත ඉදිරිපත් කිරීමට නියමිතයි.
