යුරෝපයට පනින්න සිටි බංගලියන් පිරිසක් කටුනායකින් අල්ලයි

යුරෝපයට පළා යාමේ අදහසින් මෙරටට පැමිණ නීතිවිරෝධී ලෙස රැදී සිටි බංග්ලාදේශ ජාතිකයන් දසදෙනෙක් ආගමන විගමන දෙපාර්තමේන්තු විමර්ශන අංශයේ නිලධාරීන් විසින් අත්අඩංගුවට ගෙන තිබෙනවා.

මෙම පිරිස කටුනායක, ආඩිඅම්බලම ප්‍රදේශයේ රැඳී සිටිය දී ඊයේ (24) පස්වරුවේ අත්අඩංගුවට ගෙන ඇති බවයි වාර්තා වුණේ.

මෙලෙස අත්අඩංගුවට ගැනුණු බංග්ලාදේශ ජාතිකයින් අවුරුදු 20ත් 30ත් අතර වයස්වල පසුවන අය බව සඳහන්.

මොවුන් බංගලදේශයේ සිට ඉන්දියාව වෙත පැමිණ එතැන් සිට පසුගිය පෙබරවාරි මාසයේ කටුනායක ගුවන් තොටුපොළ වෙත පැමිණ එහිදී සංචාරක වීසා ලබාගෙන මෙරට රැඳී සිට ඇති බවයි අනාවරණය වී ඇත්තේ.

මෙම බංග්ලාදේශ ජාතිකයින් අත්අඩංගුවට පත්වන අවස්ථාවේ දීත් ඔවුන්ට මෙරට රැදී සිටීමට හිමි වී තිබූ වීසා කාලය ඉක්මවා ගොස් ඇති බවයි වාර්තා වුණේ.

මෙම පිරිස ශ්‍රී ලංකාවේ සිට ඩුබායි වෙත ගොස් එතැන් සිට ඊජිප්තුව වෙත ඇතුළු වී ඉන්පසුව මධ්‍යධරණී මුහුද තරණය කර යුරෝපය වෙත පිවිසීමට සැළසුම් කර තිබූ බවයි අනාවරණය වී ඇත්තේ.

අත්අඩංගුවට ගත් බංග්ලාදේශ ජාතිකයන් පිරිස ආපසු එරටට පිටුවහල් කරන තෙක් වැලිසර රැඳවුම් මධ්‍යස්ථානයේ රඳවා තැබීමට පියවර ගෙන තිබෙනවා.