එළඹෙන පෙබරවාරි මස 04 වැනි දින පැවැත්වීමට කටයුතු සූදානම් කර තිබෙන 77 වැනි නිදහස් දින සැමරුම් උලෙළ මෙවර ජනතාවට වැඩි වශයෙන් එක් විය හැකි නිදහස් උත්සවයක් බවට පත් කරන බව රාජ්‍ය පරිපාලන අමාත්‍ය ඒ. එච්. එම්. එච්. අබේරත්න මහතා පවසනවා.
ජාතික නිදහස් දින සැමරුම සම්බන්ධයෙන් මහජනතාව දැනුවත් කිරීමට අද (30) පෙරවරුවේ රජයේ ප්‍රවෘත්ති දෙපාර්තමේන්තුවේ පැවති මාධ්‍ය හමුවට එක්වෙමින් ඒ මහතා මේ බව කියා සිටියා.
‘ජාතික පුනරුදයට පෙළගැසෙමු’ යන මැයෙන් මෙවර ජාතික නිදහස් දින සැමරුම් උලෙළ පැවැත්වෙනවා.
77 වන නිදහස් දින සැමරම් උත්සවය පෙබරවාරි 04 වන දින නිදහස් චතුරස්‍රය පරිශ්‍රය කේන්ද්‍ර කර ගනිමින් පැවැත්වීමටයි කටයුතු සූදානම් කර ඇත්තේ.
මේ අතර මාධ්‍ය හමුවට එක්වෙමින් ආරක්ෂක ලේකම් (විශ්‍රාමික) එයාර් වයිස් මාර්ෂල් සම්පත් තුයියකොන්තා මහතා පවසා සිටියේ, නිදහස් දින සැමරුම් පෙළපාලියේ සංයුතිය යම් වෙනසක් සිදුකර ඇති බවයි.
ඒ අනුව මෙවර හමුදා පෙළපාලිය සාමාජිකයින් 1,873කට සීමා වී ඇති අතර, ගිය වසරට සාපේක්ෂව හමුදා සමාජිකයින් 1,511දෙනෙකෙුගේ අඩුවීමක් බව ද ආරක්ෂක ලේකම්වරයා පැවසුවා.
එමෙන්ම මෙවර නිදහස් දින සැමරුමට ත්‍රිවිධ හමුදා සන්නද්ධ රථ යොදා නොගන්නා බව ද ආරක්ෂක ලේකම්වරයා වැඩිදුරටත් කියා සිටියා
නාවික හමුදාව විසින් සාම්ප්‍රදායික වෙඩිමුර 25ක් පැවැත්වීමට නියමිත බවත් ගියවර භාවිත කළ ගුවන් යානා 19න් මෙවර ගුවන් යානා 3ක් පමණක් නිදහස් දින සැමරුම වෙනුවෙන් යොදාගන්නා බවත් හෙතෙම දැනුම්දුන්නා.
