ශ්රී ලංකාවේ ආහාර සුරක්ෂිතතාවට එල්ල වන අභියෝගවලට මුහුණදීමට ජාත්යන්තර වාණිජ මණ්ඩලයේ සහාය ලබාදීමට තීරණය කර තිබෙනවා.
අග්රාමාත්ය මාධ්ය කාර්යාලය සඳහන් කළේ; ජාත්යන්තර වාණිජ මණ්ඩලයේ (ICC) ප්රථම කාන්තා සභාපති වන මාරියා ෆනෑන්ඩර් ග්ර්සා (Maria Fernanda Garza) සහ අග්රාමාත්ය දිනේෂ් ගුණවර්ධන අතර හමුවක් ඊයේ අරලියගහ මන්දිරයේදී සිදු වූ අවස්ථාවේ දී මේ බව අවධාරණය කෙරුණු බවයි.
වෙළෙඳ හා ආයෝජන, බැංකු, රක්ෂණ, පුහුණුව සහ අධ්යාපනය, මූල්ය, සංචාරක, කෘෂිකර්මය, කුඩා හා මධ්ය පරිමාණ ව්යවසායකත්ව සහාය සහ ව්යවසායකත්ව සංවර්ධනය සහ එම ක්ෂේත්රවල ගැටලු බේරුම්කරණය ඇතුළත් ශ්රී ලංකාවේ ICC හි කාර්යභාරය පිළිබඳ ව මෙම සාකච්ඡාවේ දී අවධානය යොමු කෙරුණා.
නවීන තාක්ෂණය සමග ආර්ථිකය ඉදිරියට යාම සඳහා ඩිජිටල්කරණය අත්යාවශ්ය බව අවධාරණය කළ මාරියා ෆනෑන්ඩර් ග්ර්සා මහත්මිය ඉන් කුඩා හා මධ්ය පරිමාණ ව්යවසායකයින්ට මෙන්ම කෘෂි ක්ෂේත්රවල නියැලී සිටින ග්රාමීය ජනතාවට ද විශාල අවස්ථා විවර වනු ඇතැයි පෙන්වා දුන්නා.
ආහාර සුරක්ෂිතතාව සහ අපනයනය ඇතුළත් රජයේ ප්රමුඛතා පිළිබඳ ව මෙහිදී පැහැදිලි කළ අග්රාමාත්යවරයා යම් යම් අංශ ශ්රී ලංකාව පිළිබඳ ව වැරදි චිත්රයක් මවා පෑමට උත්සාහ ගන්නා බවත්; නමුත් ලොව ප්රබල පිළිගැනීමක් ඇති ජාත්යන්තර වාණිජ මණ්ඩලයට ජිනීවා, එක්සත් ජාතීන්ගේ සමුළුව වැනි ජාත්යන්තර වේදිකාවල දී මෙරට නිවැරදි තත්ත්වය පැහැදිලි කිරීමට වැදගත් කාර්යභාරයක් ඉටුකළ හැකි බව ද වැඩිදුරටත් අවධානය යොමු කළා.
