මෙරටට වාහන ආනයනය කිරීමේ දී ගෙන්වන වාහනවල පාවිච්චි කළ කාලසීමාව වසර 05ක් දක්වා ඉහළ දැමිය යුතු බව වහන ආනයනකරුවන්ගේ සංගමයේ සභාපති ඉන්දික සම්පත් මෙරෙන්චිගේ පවසනවා.
අද (12) දිනයේ මාධ්‍ය හමුවක් පවත්වමින් සභාපතිවරයා මේ බව සඳහන් කළා.
එහිදී සභාපතිවරයා චෝදනා කර සිටියේ මුදල් අමාත්‍යාංශයේ අත්තනෝමතිකව කටයුතු කරන ඇතැම් නිලධාරීන් එම කාල සීමාව වසර 03ක් දක්වා අඩු කිරීමට කටයුතු කර ඇති බවයි.
මේ හේතුවෙන් අඩු ආදායම්ලාභීන්ට වාහනයක් මිල දී ගැනීමට ඇති හැකියාව ඔවුන් විසින් අහිමිකර ඇති බව ද සභාපතිවරයා වැඩිදුරටත් සඳහන් කර සිටියා.
මේ හේතුවෙන් ජනතාවට රජය කෙරෙහි අප්‍රසාදයක් ඇතිවීමට ඉඩ පවතින බවයි සභාපතිවරයා පැවසුවේ.
එමෙන්ම පාවිච්චි කළ වාහන ගෙන්වීමේ දී එය අවුරුදු තුනේ සීමාව පහේ සීමාවට නොගෙන ආවොත් ඒ තුළින් මහජනතාවගේ මුදල් අනිසි පාවිච්චක් ද සිදුවන බව ඔහු මෙම මාධ්‍ය හමුවේ දී සඳහන් කර සිටියා.
