පළාත් පාලන ඡන්ද විමසීම කල් දමන නියෝගයක් නිකුත් කරන ලෙස ඉල්ලා විශ්‍රාමික යුධ හමුදා කර්නල් ඩබ්ලිව්.එම්.ආර්. විජේසූන්දර ඉදිරිපත් කළ පෙත්සම ලබන 23 වනදා ට පෙර සලකා බැලීම සඳහා කැඳවන ලෙස ඉල්ලමින් ගොනු කළ මෝසම සලකා බැලීමට අනවශ්‍ය බව ඔහුගේ නීතිඥවරු අද (20) ශ්‍රේෂ්ඨාධිකරණයට දැනුම් දුන්නා.
ඒ, අනුව දාළ පෙත්සම සලකා බැලීම සඳහා කලින් නියම කළ පරිදි ලබන 23 වනදා කැඳවීමට ශ්‍රේෂ්ඨාධිකරණය නියම කළා.
මෙම මෝසම අද (20) එස්.තුරෙයි රාජා සහ ශිරාන් ගුණරත්න යන විනිසුරුවරුන්ගෙන් සමන්විත විනිසුරු මඩුල්ල ඉදිරියේ කැඳවනු ලැබුවා.
එහිදී පෙත්සම්කාර පාර්ශ්වය වෙනුවෙන් පෙනී සිටි ජනාධිපති නීතිඥ ෆයිස් මුස්තාපා අධිකරණය හමුවේ කරුණු දක්වමින් මෙම පෙත්සම වැඩිදුර සලකා බැලීම සඳහා ලබන 23 වනදා කැඳවීමට ශ්‍රේෂ්ඨාධිකරණය ඉකුත් 10 වනදා තීන්දු කළ බව සඳහන් කළා.
එහෙත් තැපැල් ඡන්ද විමසීම ලබන 22 වනදා පැවැත්වීමට නියමිතව තිබූ බැවින් ඊට පෙර මෙම නඩුව සලකා බැලීම සඳහා කැඳවන ලෙස ඉල්ලා අදාළ මෝසම ගොනු කළ බව ජනාධිපති නීතිඥවරයා පෙන්වා දුන්නා.
එහෙත් මේ වන විට ලබන 23 වනදාට පෙර තැපැල් ඡන්ද විමසීම නොපැවැත්වෙන බවට තම සේවාදායකයාට විශ්වාසදායක තොරතුරු ලැබී ඇති හෙයින් මෙම මෝසම සලකා බැලීම අවශ්‍ය නොවන බවත් ජනාධිපති නීතිඥවරයා දන්වා සිටියා.
එම ඉල්ලීමට මැතිවරණ කොමිසම වෙනුවෙන් පෙනී සිටි ජනාධිපති නීතිඥ සාලිය පීරිස් මහතා විරෝධය පළ කළේ නැහැ.
ඒ, අනුව අදාළ ඉල්ලීමට අවසර දුන් ශ්‍රේෂ්ඨාධිකරණ අදාළ පෙත්සම කලින් නියම කළ පරිදි ලබන 23 වනදා වැඩිදුර සලකා බැලීම සඳහා කැඳවන ලෙස ද නියෝග කළා.
