විදෙස් ගතව සිට මෙරටට පැමිණ සිටින තම බිරිදව තමන් ළඟට ගෙන්වා දෙන ලෙස කරන ලද ඉල්ලීමකට සහාය නොදීමට විරෝධය පළ කරමින් මාදම්පේ නගරය මධ්‍යයේ පිහිටි ඔරලෝසු කණුවට නැග සිටි පුද්ගලයෙකුව බිමට බස්සවා රෝහල් ගත කිරීමට පොලිසිය කටයුතු කර තිබෙනවා.
එලෙස රෝහල් ගත කරන ලද්දේ මාදම්පේ – මැල්ලවාගාර ප්‍රදේශයේ පදිංචිව සිටින කරුපයියා බාබු හෙවත් බාබු නැමති 48 හැවිරිදි අයෙක්.
අද (16) දහවල් මොහු මාදම්පේ නගරයේ පිහිටි ඔරලෝසු කණුවට නැග මෙලෙස විරෝධතාවයක නිරත වුණා.
ඔහු එම ඔරලෝසු කණුවේ මුහුණත සවි කර තිබූ වීදුරු කීපයක් ද එහි දී බිඳ බිම දමා ඇති බවයි වාර්තා වුණේ.
ඔරලෝසු කණුවට නැග සිටි මොහු බිමට ගැනීමට මාදම්පේ පොලීසිය දැඩි උත්සාහයක් දැරූ අතර, පසුව ප්‍රදේශවාසීන් කීපදෙනෙකු විසින් ඉනිමගක් ආධාරයෙන් ඔරලෝසු කණුවට නැග ඔහුව බිමට බස්සවා ගැනීමට කටයුතු කළා.
ඔරලෝසු කණුවේ මුහුණතට සවි කර තිබූ වීදුරු බිදීම හේතුවෙන් ඔහුගේ ශරීරයේ ස්ථාන කීපයක් තුවාල වී තිබූ අතර පසුව ඔහුව මාදම්පේ ප්‍රාදේශීය රෝහලට ඇතුළත් කෙරුණා.
මාදම්පේ නගරයේ දී එක්තරා පුද්ගලයෙකු තමන්ට පහර දුන් බව ඔරලෝසු කණුවට නැග සිටි මෙම පුද්ගලයා ප්‍රකාශක කර ඇති අතර පසුව පහර දුන් බව කියන පුද්ගලයා ද පොලිස් භාරයට ගෙන තිබෙනවා.
