මහවැලියට අයත් වික්ටෝරියා රක්ෂිත ප්‍රදේශයක පදිංචිව සිටි පවුල් හතරක සාමාජිකයින්ට දැනට මාසයකට ආසන්න කාලයක සිට ගස් යට දිවි ගෙවීමට සිදුව ඇති බව දසත නිවුස් අපට වාර්තා වුණා.
අනවසරයෙන් වැව් රක්ෂිතයේ පදිංචිව සිටි පුද්ගලයින් ඉවත් කිරිමට මහවැලි අධිකාරිය ගත් තීරණය හේතුවෙන් ඔවුන්ට මෙලෙස ගස් යට දිවි ගෙවන්නට සිදුව තිබෙනවා.
මහනුවර, කුණ්ඩසාලේ ප්‍රාදේශීය ලේකම් කොට්ඨාසයේ විදුරගේවත්ත ප්‍රදේශයේ පවුල් හතරක සාමාජිකයින් මීට පෙර පදිංචිව සිටියේ මහවැලියට අයත් වික්ටෝරියා රක්ෂිත ප්‍රදේශයේයි.
ඔවුන්ට පසුගිය පෙබරවාරි 28 වැනිදා සිය නිවෙස් අතහැර යන්නට සිදු වන්නේ අනවසර පදිංචිකරුවන් වීම හේතුවෙන්.
නමුත් වෙනත් කිසිදු විකල්පයක් නොමැති ඔවුන්ට සිදු ව ඇත්තේ රක්ෂිතයේම විශාල ගස් යට තාවකාලික පොලිතීන් ආවරණයක් තුළ දිවි ගෙවීමටයි.
මෙම පවුල් හතරෙහි දරුවන් 10 දෙනෙක් සිටින අතර, ඔවුන් අතරින් දරුවන් හත්දෙනෙක්ම පාසල් යන වයසේ පසු වුවද ඔවුන් මේ වන විට පාසල් නොයන බව මව්පියන් අප සමග පැවසුවා.
මෙම පිරිස වික්ටෝරියා රක්ෂිත ප්‍රදේශයේ පදිංචි වී ඇත්තේ වසර 25කටත් පෙරයි.
එහි ඉදිකර තිබූ නිවාස සඳහා විදුලිය සහ නල ජලය ද ඔවුන් ලබා ගෙන තිබුණා.
අනවසර පදිංචිකරුවන් ලෙස සලකා ඔවුන් නීත්‍යානුකූලව ඉවත් කරන්නේ එවන්
පසුබිමකයි.
තමන් වෙනුවෙන් යම් හෝ සාධාරණයක් ඉටු කරන්නැයි ඔවුන්ගේ එකම ඉල්ලීමයි.
