මහජන ආරක්ෂක අමාත්ය ආනන්ද විජේපාල මහතාට පාර්ලිමේන්තු මන්ත්රී ධුරයක් දැරීමට සුදුසුකම් නොමැති බවට තීන්දු කොට ඔහුගේ මන්ත්රී ධුරය බලරහිත කිරීමේ නියෝගයක් නිකුත් කරන ලෙස ඉල්ලා ගොනුකෙරුණු රිට් පෙත්සමක් විභාගයට නොගෙන නිෂ්ප්රභ කිරීමට අභියාචනාධිකරණය නියෝග කර තිබෙනවා.
දසත අධිකරණ වාර්තාකරු පැවසුවේ, අභියාචනාධිකරණයේ වැඩබලන සභාපති මොහොමඩ් ලෆාර් තාහීර් සහ සරත් දිසානායක යන මහත්වරුන්ගෙන් සමන්විත අභියාචනාධිකරණ විනිසුරු මඬුල්ලක් විසින් මෙම නියෝගය අද (07) ප්රකාශයට පත් කළ බවයි.
මහජන ආරක්ෂක අමාත්ය ආනන්ද විජේපාල මහතාගේ පාර්ලිමේන්තු මන්ත්රී ධුරය බල රහිත කිරීමේ අඥාවක් නිකුත් කරන ලෙස ඉල්ලා
ශ්රී ලංකා පොදු ජන පෙරමුණේ පාලක ලේකම් රේණුක පෙරේරා මහතා විසින් ඉදිරිපත් කළ පෙත්සම සම්බන්ධයෙන් නීතිපතිවරයා ප්රමුඛ වගඋත්තරකරුවන් ඉදිරිපත් කළ මුලික විරෝධතා සම්බන්ධයෙන් නියෝගය නිකුත් කරමින් විනිසුරු මඩුල්ල පෙත්සම නිෂ්ප්රභා කිරිමට නියෝග කළා.
පෙත්සමේ වගඋත්තරකරුවන් ලෙස අමාත්ය ආනන්ද විජේපාල, පාර්ලිමේන්තු මහලේකම් සහ නීතිපතිවරයා නම් කර තිබුණා.
පෙත්සම්කරු අදාළ පෙත්සම මගින් දක්වා ඇත්තේ වග උත්තරකර ආනන්ද විජේපාල මහතා මහජන ආරක්ෂක අමාත්යවරයා වශයෙන් ජනාධිපතිවරයා විසින් ඉකුත් නොවැම්බර් මස 18 වැනිදා පත්කරන ලද බවයි.
පසුව ඉකුත් දෙසැම්බර් මස 10 වැනි දා නිකුත් වූ මෙරට ජාතික ඉංග්රීසි පුවත්පතක් මගින් ආනන්ද විජේපාල මහතා ජනාධිපතිවරයාගේ කාර්ය මණ්ඩල ප්රධානියා වශයෙන් පත් කර තිබෙන බව වාර්තා කර තිබූ බවත් පෙත්සමේ සඳහන්.
පසුව මේ පිළිබඳව තමා තොරතුරු දැනගැනීමේ වන යටතේ ඉල්ලීමක් කළ අතර එහිදී අමාත්ය ආනන්ද විජේපාල මහතා ජනාධිපතිවරයාගේ කාර්ය මණ්ඩල ප්රධානියා වශයෙන් පත්කර තිබෙන බව තහවුරු කරගත් බවත් පෙත්සම්කරු සඳහන් කර තිබෙනවා.
ආණ්ඩුක්රම ව්යවස්ථාවේ 91 වන ව්යවස්ථාව යටතේ රාජ්ය සේවයේ නිරත අයෙකු පාර්ලිමේන්තුවේ අසුන් ගැනීමට හා ඡන්දය ප්රකාශ කිරීමට සුදුසුකම් නොලබන බව දක්වා ඇතැයි ද පෙත්සම්කරු පවසනවා.
ජනාධිපතිවරයාගේ කාර්යය මණ්ඩල ප්රධානියා යනු රාජ්ය තනතුරක් යැයි පෙන්වා දෙන පෙත්සන්කරු ඒ අනුව එවැනි තනතුරක් දරමින් පාර්ලිමේන්තු මන්ත්රී ධුරයක් දැරීමට අමාත්ය ආනන්ද විජේපාල මහතාට සුදුසුකමක් නොමැති බවත් අදාළ පෙත්සසම මගින් පෙන්වා දී තිබෙනවා.
ඒ අනුව ආණ්ඩුක්රම ව්යවස්ථාව ප්රකාරව ආනන්ද විජේපාල අමාත්යවරයාට පාර්ලිමේන්තු මන්ත්රී ධුරයක් දැරීමට සුදුසුකම් නොමැති බවට තීන්දුකොට ඔහුගේ මන්ත්රී ධූරය බල රහිත කිරීමේ තීන්දුවක් ලබා දෙන ලෙසත් පෙත්සම්කරු අධිකරණයෙන් ඉල්ලා තිබු අතර ඊට අමතරව මෙම පෙත්සම විභාග කොට අවසන් තීන්දුවක් ප්රකාශයට පත් කරනතුරු ආනන්ද විජේපාල මහතා පාර්ලිමේන්තු මන්ත්රීවරයෙකු වශයෙන් අසුන් ගැනීම හා පාර්ලිමේන්තුවේ ඡන්දය ප්රකාශ කිරීම වළක්වාලමින් අතුරු තහනම් නියෝගයක් නිකුත් කරන ලෙස ද පෙත්සමෙන් ඉල්ලා තිබුණා.
එසේම ආනන්ද විජේපාල මහතා මහජන ආරක්ෂක අමාත්ය ධුරයේ කටයුතු කිරීම වළක්වාලන අතුරු තහනම් නියෝගයක් නිකුත් කරන ලෙසත් පෙත්සමෙන් වැඩිදුරටත් ඉල්ලා තිබු අතර පෙත්සම සම්බන්ධයෙන් ඉදිරිපත් වූ කරුණු සලකා බැලු විනිසුරු මඩුල්ල පෙත්සම නිෂ්ප්රභා කිරිමට නියෝග කළා.
