වසර 2050 වන විට ශුද්ධ ශුන්ය කාබන් විමෝචන ඉලක්කය සපුරා ගැනීමේ රජයේ වැඩපිළිවෙළට අනුකූලව CEYLEX Renewables ආයතනය විසින් මන්නාරමේ ඉදිකළ, මෙගාවොට් 20ක ධාරිතාවයකින් යුත් ‘මන්නාරම වින්ඩ්ස්කේප්’ (WINDSCAPE MANNAR) සුළං විදුලි බලාගාරය අද (15) පෙරවරුවේ ජනාධිපති අනුර කුමාර දිසානායකගේ ප්රධානත්වයෙන් නිල වශයෙන් ජාතික විදුලිබල පද්ධතියට එක් කෙරුණා.
‘මන්නාරම වින්ඩ්ස්කේප්’ සුළං විදුලි ව්යාපෘතිය යටතේ මෙරට බලශක්ති ඉතිහාසයේ පළමු වතාවට, එක් ටර්බයිනයක ධාරිතාව මෙගාවොට් 05 ක් වූ මෙරට ස්ථාපිත විශාලතම සුළං ටර්බයින 04ක් බලගැන්වෙනවා.
මෙය ශ්රී ලංකා ඉතිහාසයේ රාජ්ය හෝ පෞද්ගලික අංශය යටතේ මෙගාවොට් 5 (5 MW) ධාරිතාවෙන් යුතු ටර්බයින භාවිතයෙන් නිමකළ ප්රථම සුළං බල ව්යාපෘතිය වන අතර පූර්ණ දේශීය සමාගමක් මගින් මෙම ව්යාපෘතිය ක්රියාත්මක කරනවා.
සුළං විදුලි බලාගාරය විවෘත කරමින් සමරු ඵලකය නිරාවරණය කිරීමේ අවස්ථාවට එක් වූ ජනාධිපතිවරයා ටර්බයින ක්රියාත්මක කිරීමේ අවස්ථාවටද එක් වුණා.
බලශක්ති අමාත්ය ඉංජිනේරු කුමාර ජයකොඩි, බලශක්ති නියෝජ්ය අමාත්ය අර්කාම් ඉල්යාස් සහ ප්රදේශයේ මහජන නියෝජිතයන්ද, ආරක්ෂක අමාත්යාංශයේ ලේකම් විශ්රාමික එයාර් වයිස් මාර්ෂල් සම්පත් තුයියකොන්තා, පොලිස්පති ප්රියන්ත වීරසූරිය ඇතුළු ආරක්ෂක අංශ ප්රධානින්ද, මන්නාරම දිස්ත්රික් ලේකම් කේ. කනකේෂ්වරන්, ලංකා විදුලිබල මණ්ඩලයේ සාමාන්යාධිකාරී ඉංජිනේරු ශර්ලි කුමාර, ශ්රී ලංකා සුනිත්ය බලශක්ති අධිකාරියේ සභාපති මහාචාර්ය විජේන්ද්ර බණ්ඩාර යන අයද, CEYLEX Renewables ආයතනයේ ප්රධාන විධායක නිලධාරි ඉංජිනේරු සමීර ගනේගොඩ සහ එහි නියෝජිතයන් ඇතුළු පිරිසක් මෙම අවස්ථාවට එක්ව සිටියා.
