මත්ද්රව්ය ජාවාරමට සම්බන්ධ වන ඕනෑම පාර්ශ්වයක් වෙත දැඩි නීතිමය පියවර ගන්නා බව නියෝජ්ය ආරක්ෂක අමාත්ය, විශ්රාමික මේජර් ජෙනරාල් අරුණ ජයසේකර මහතා පවසනවා.
ඊයේ (27) රාත්රියේ දී ශ්රී ලංකාවට දකුණෙන් වූ ගැඹූරු මුහුදේ දී, නාවික හමුදා භාරයට ගැනුණු බහුදින ධීවර යාත්රා දෙකෙහි තිබූ මත්ද්රව්ය තොගය සමග සැකකාර ධීවරයින් 11 දෙනා අද දහවල් දික්ඕවිට වරාය වෙත රැගෙන ආ අවස්ථාව නිරීක්ෂණය කිරීමට එක්වෙමින් නියෝජ්ය ආරක්ෂක අමාත්යවරයා මේ බව සඳහන් කළා.
ශ්රී ලංකා නාවික හමුදාව, රාජ්ය බුද්ධි සේවාව, පොලිස් මත්ද්රව්ය නාශක කාර්යාංශය සහ කලාපීය මෙහෙයුම් සම්බන්ධීකරණ මධ්යස්ථානය හා එක්ව සිදු කළ විශේෂ ඒකාබද්ධ මෙහෙයුමක් මගින්, මත්ද්රව්ය තොගය සොයා ගැනුණා.
මෙම මත්ද්රව්ය තොගයේ වෙළෙඳපොළ වටිනාකම තවමත් ගණනය කරමින් සිටින බව ද නාවික හමුදා මාධ්ය අංශය නිවේදනය කළා.
එම බහුදින ධීවර යාත්රා දික්ඕවිට වරායට රැගෙනවිත්, අද පොලිස් මත්ද්රව්ය නාශක කාර්යාංශයේ විශේෂඥ සහාය ද සහිතව සිදු කළ වැඩිදුර පරීක්ෂාවේදී, ප්රවාහනය කරමින් තිබූ මත්ද්රව්ය හෙරොයින් සහ අයිස් බවට තහවුරු කරගත්තා.
දැනට සිදු කෙරෙන පරීක්ෂණවලින් අනාවරණය වී ඇත්තේ, මෙම ධීවර යාත්රාවල මත්ද්රව්ය ආසන්න වශයෙන් කිලෝග්රෑම් 600කට වඩා වැඩි ප්රමාණයක් ඇති බවටයි.
එම මත්ද්රව්ය තොගය නිරීක්ෂණය සඳහා නාවික හමුදාධිපති සහ වැඩබලන පොලිස්පතිවරයා ද සහභාගී වී සිටියා.
එම මත්ද්රව්ය තොගය, සැකකරුවන් සහ බහුදින ධීවර යාත්රා ඉදිරි නීතිමය කටයුතු සඳහා පොලිස් මත්ද්රව්ය නාශක කාර්යාංශය වෙත භාරදීමට නියමිත ව තිබෙනවා.
