මෑතකදී ශ්රී ලංකා මහ බැංකුව විසින් පාරිභෝගික භාණ්ඩ 600කට වැඩි සංඛ්යාවකට පැනවූ ආනයන සීමාවන් පිළිබඳව නැවත සලකා බැලිය යුතු බව ජනාධිපති ලේකම් පී.බී. ජයසුන්දර ප්රකාශ කරයි.
ශ්රී ලංකා මහ බැංකුව මේ මස මුලදී සිය ආනයන සීමා තවදුරටත් පුළුල් කරමින් ජංගම දුරකථන, ගෘහ විදුලි උපකරණ සහ ආහාර වර්ග ඇතුළු භාණ්ඩ වර්ග 623කට ආනයනයේදී බැංකුවේ තැන්පත් කළයුතු මුදල් සීමාව දෙගුණ කරමින් එම භාණ්ඩ ආනයනය අධෛර්යවත් කරනු ලැබීය.
මහ බැංකුව සතු ඩොලර් සංචිත ශීඝ්රයෙන් පහත වැටීම ඊට හේතුවයි.
එහෙත්, විශේෂයෙන් පසුගිය වසරේ වසංගතය ආරම්භ වීමෙන් පසු වේගයෙන් ඉහළ යන විදේශ විනිමය මෙරටට ගෙනඑන තොරතුරු තාක්ෂණ කර්මාන්තයට (IT) මෙම තහංචි බරපතළ ලෙස බලපා ඇත.
ඉකොනොමි නෙක්ස්ට් වෙබ් අඩවියට අදහස් පළකරමින් ජනාධිපති ලේකම්වරයා පවසන්නේ එවැනි සීමා කිරීම් පශ්චාත් කොවිඩ් -19 ආර්ථික ප්රතිසාධන සැලැස්මට නොගැලපෙන බවයි.
“තොරතුරු තාක්ෂණය යනු අපනයන වේගයෙන් ඉහළ ගොස් ඇති අංශයක් වන අතර එම ක්ෂේත්රය මේ වසරේදී ඩොලර් බිලියන එකයි දශම හතක අපනයන ඉලක්කයක් හඹා යයි. දැන් මහ බැංකුව තොරතුරු තාක්ෂණ නිෂ්පාදන සඳහා සියයට සියයක ණය ආන්තිකයක් පනවා ඇති අතර එය හිතකර නොවේ” යැයි ජනාධිපති ලේකම්වරයා පෙන්වා දෙයි.
පශ්චාත් කොවිඩ් -19 ආර්ථික ප්රතිසාධන සැලැස්ම සියලුම පාර්ශ්ව සමග සාමූහිකව සිදු කෙරෙන බැවින් අපනයන ආදායම් අඛණ්ඩව පවත්වාගැනීම සඳහා මෙම කරුණු නැවත සලකා බැලිය යුතු බවද හෙතෙම වැඩිදුරටත් සඳහන් කරයි.
නයන තරංග ගමගේ
