මෙම මස අග දී ඕස්ට්‍රේලියානු කණ්ඩායම සමඟ පැවැත්වෙන තරග පහකින් සමන්විත ටෙස්ට් තරග මාලාව ඉන්දීය ප්‍රබල ක්‍රීඩකයින් කිහිප දෙනෙකුගේ ම අවසන් තරගාවලිය වනු ඇති බව බවට ඉන්දීය මාධ්‍ය වාර්තා කරනවා.
ඒ, අනුව ඉන්දීය ටෙස්ට් නායක රෝහිත් ශර්මා, විරාත් කෝලි, රවීන්ද්‍ර ජඩේජා සහ රවිචන්ද්‍රන් අශ්වින් යන ජ්‍යෙෂ්ඨ ඉන්දීය ක්‍රීඩකයන්ගේ අනාගතය මෙම තරගාවලියෙන් පසු තීරණය වනු ඇති බවයි එම වාර්තා සඳහන් කරන්නේ.
ඒ අනුව බොහෝ විට මෙම ජ්‍යෙෂ්ඨ ක්‍රීඩකයින් හතර දෙනාගෙන් දෙදෙනකුටවත් ඕස්ට්‍රේලියාවට එරෙහිව පැවැත්වෙන තරග පහකින් සමන්විත ටෙස්ට් තරගාවලිය අවසන් තරගාවලිය වීමට වැඩි ඉඩකඩක් පවතින බවයි ඉන්දීය මාධ්‍ය වාර්තා වැඩිදුරටත් පවසන්නේ.
නවසීලන්තය සමඟ අද නිමා වූ තරග තුනකින් සමන්විත ටෙස්ට් තරගාවලිය අවමන් සහගත ලෙස පරාජයට පත්වීමට ඉන්දීය කණ්ඩායමට සිදුවීමත් සමඟ මෙම ජ්‍යෙෂ්ඨ ක්‍රීඩකයින්ගේ ඉදිරි අනාගතය පිළිබඳව මේ වනවිට කතා බහක් මතුව තිබෙනවා.
මේ අතර ඉන්දියාව සහ ඕස්ට්‍රේලියාව අතර පැවැත්වෙන බෝඩර් – ගවස්කාර් කුසලානය ටෙස්ට් තරගාවලියේ ප්‍රතිඵලය ඉන්දියාවේ ලෝක ටෙස්ට් ශුරතාවේ ස්ථානය තීරණය කරන ප්‍රබල සාධකයක් බවට මේ වන විට පත්ව තිබෙනවා.
යම් හෙයකින් බෝඩර් ගවස්කාර්-කුසලානය ඉන්දියාව පරාජයට පත්වුව හොත් ඉන්දියාවට අවසන් මහා තරගයේ ස්ථාන වෙන් කර ගැනීමට අනෙක් කණ්ඩායම්වල තීරණය දෙස බලා සිටීමට සිදුවනවා.
