මුලතිව්, මල්ලාවි, විනායගපුරම් ප්රදේශයේ වැව් රක්ෂිතයක තිබී මියගිය ඇතින්නකගේ මළ සිරුරක් පසුගිය දා හමු වී තිබෙනවා.
විනායගපුරම් ගම්වාසීන් විසින් මුලතිව් වනජීවි කාර්යාලයට ඒ සම්බන්ධයෙන් දැනුම්දීමෙන් අනතුරුවයි එය සොයාගෙන ඇත්තේ.
මෙලෙස මියගොස් ඇත්තේ අවුරුදු 35ත් 40ත් අතර වයසේ පසු වූ ඇතින්නියක් වන අතර, මෙම සත්වයා මිය යනවිට ගැබ්ගෙන සිටි බවට අනාවරණය වූ බවයි වනජීවී නිලධාරීන් පැවසුවේ.
මෙම සත්වයා මිය යාමට පෙර බිම්බෝම්බයකට හසුව පාදයකට බරපතළ හානි සිදුව ඇති බවට ද නිරීක්ෂණය වී තිබෙනවා.
කෙසේ වෙතත් මෙම ඇතින්න බිම්බෝම්බයට හසු වී සිදුවූ තුවාල හේතුවෙන් මියගොස් නොමැති බවත්, පැටවෙකු බිහිකිරීමට ආසන්නව සිටිය දී ගැබතුළ සිදු වූ අභ්යන්තර රුධිර වහනයක් හේතුවෙන් මිය ගොස් ඇති බවටයි සිදුකළ මරණ පරීක්ෂණයේ දී අනාවරණය වී ඇත්තේ.
වනජීවී නිලධාරීන් සැකපළ කරන්නේ ඇතින්න බිම්බෝම්බයට හසුව පාදයකට බරපතළ හානි සිදු වූ පසු පාද තුනෙන්, අසල තිබූ වැව් බැම්ම නැඟීමට ගත් උත්සාහයක දී ඉන් පහළට පෙරළී යාමෙන් ගැබට හානි සිදුව අභ්යන්තර රුධිර වහනයක් හේතුවෙන් මෙම ඇතින්න මිය ගොස් ඇති බවටයි.
