බස් රථයක් තුළ දී තරුණියකගේ කොණ්ඩයෙන් කොටසක් කපා දැමූ මවුලවිවරයෙක් මහනුවර පොලිසිය මඟින් ඊයේ (13) අත්අඩංගුවට ගෙන තිබෙනවා.
මහනුවර – වත්තේගම මාර්ගයේ ගමන් ගත් මගී ප්‍රවාහන බස් රථයක ගමන් ගනිමින් සිටි තරුණියකගේ කොණ්ඩය සැකකාර මව්ලවිවරයා විසින් මෙලෙස කපා දමා ඇති බවයි වාර්තා වුණේ.
තමන් අසුන්ගෙන සිටි අසුනට පසුපස අසුනේ ඉඳගෙන සිටි පුද්ගලයා විසින් තම වරලසෙන් අඩියක් පමණ කොටසක් කතුරකින් කපා දැමූ බවයි මඩවල ප්‍රදේශයේ පදිංචි 26 හැවිරිදි තරුණිය පොලිසියට පවසා ඇත්තේ.
එම අවස්ථාවේ දී තරුණියගේ කෑ ගැසීමත් සමඟ කොන්දොස්තරවරයා සහ තවත් මගීන් කිහිප දෙනෙකු විසින් සැකකාර මව්ලවිවරයා අල්ලාගෙන තිබෙනවා.
එහිදී සැකකරු බස් රථයෙන් බැස පළායාමට උත්සාහ කර ඇති අතර, බස් රථයේ දොරවල් වසා ඔහුට පැන යාමට වළක්වා ඇති බවයි වාර්තා වුණේ.
අනතුරුව බස් රථය මහනුවර පොලිසිය වෙත ධාවනය කිරීමට එහි රියදුරුවරයා කටයුතු කර ඇති අතර, අනතුරුව පොලිසිය විසින් සැකකාර මව්ලවිවරයා අත්අඩංගුවට ගැනීමටයි කටයුතු කර ඇත්තේ.
අත්අඩංගුවට ගැනුණු සැකකරු පොලිසිය හමුවේ පවසා ඇත්තේ තරුණියගේ කොණ්ඩය කැපීම සඳහා ක්ෂණිකව ඇතිවූ සිතුවිල්ලක් මත මෙම ක්‍රියාව සිදුකළ බවයි.
සැකකරු මුරුතලාව ප්‍රදේශයේ පදිංචිකරුවෙක් වන අතර, සිද්ධිය සම්බන්ධයෙන් මහනුවර පොලීසියේ ළමා හා කාන්තා කාර්යාංශය වැඩිදුර විමර්ශන සිදුකරනවා.
