කොළඹ මැගසින් බන්ධනාගාරයේ ආරවුලක් හේතුවෙන් රැඳවියෙක් මියයෑමේ සිද්ධියට අදාළව බොරැල්ල පොලීසිය විසින් අත්අඩංගුවට ගත් බන්ධනාගාර නිලධාරීන් තිදෙනා මැයි මස 6 වෙනිදා දක්වා රක්ෂිත බන්ධනාගාරගත කරන ලෙස අලුත්කඩේ මහේස්ත්රාත් අධිකරණය වෙත නියෝග කරනු ලැබුවා.
මැගසින් බන්ධනාගාරයේ ජේරල්වරයෙක් සහ නියාමකවරු දෙදෙනෙක් මෙලෙස රක්ෂිත බන්ධනාගාරගත කර තිබෙනවා.
සැකකරුවන් අද (28) අලුත්කඩේ මහේස්ත්රාත් අධිකරණයට ඉදිරිපත් කළ අවස්ථාවේදී මෙම නියෝගය ලබා දුන්නා.
කොළඹ මැගසින් බන්ධනාගාරයේ රැඳවියන් දෙදෙනෙක් සහ නියාමකවරයෙක් අතර ඊයේ (27) පෙරවරුවේ ආරවුලක් හටගෙන ඇති අතර එහිදී ඔවුන් තිදෙනාම තුවාල ලබා ප්රතිකාර සඳහා බන්ධනාගාර රෝහලට ඇතුළත් කර තිබෙනවා.
පොලීසිය සඳහන් කළේ, එලෙස රෝහල් ගත කෙරුණු එක් රැඳවියෙකු පසුව මියගොස් ඇති බවයි.
මියගොස් ඇත්තේ මත්ද්රව්ය චෝදනාවක් මත අත්අඩංගුවට ගෙන රක්ෂිත බන්ධනාගාර ගතකර සිටි 37 හැවිරිදි නවගම්පුර, කොළඹ 14 ප්රදේශයේ පදිංචිව සිටි පුද්ගලයෙක්.
