2023 යල කන්නයේ දී වී වගාවට අවශ්ය රසායනික පොහොර හෝ කාබනික පොහොර මිල දී ගැනීම සඳහා රජය විසින් පොහොර සහනාධාරය වශයෙන් රුපියල් කෝටි 1000ක් වෙන් කර ඇති බව කෘෂිකර්ම අමාත්යාංශය සඳහන් කරනවා.
මෙම මුදල් ගොවීන් 650,000කට හෙක්ටයාර් එකකට රුපියල් 20,000ක් හා හෙක්ටයාර් දෙකකට රුපියල් 40,000ක් වශයෙන් වවුචර්පත් මගින් ලබාදීමටයි පියවර ගෙන ඇත්තේ.
මේ යටතේ හම්බන්තොට දිස්ත්රික්කයේ වී වගා කරන ගොවීන්ට වවුචර්පත් ප්රදානය කිරීම ඊයේ (26) කෘෂිකර්ම අමාත්ය මහින්ද අමරවීර සහ ගොවිජන සංවර්ධන දෙපාර්තමේන්තුවේ නිලධාරින්ගේ සහභාගිත්වයෙන් සිදු කෙරුණා.
ඒ අනුව හම්බන්තොට දිස්ත්රික්කයේ වී ගොවීන් සදහා රුපියල් මිලියන 400ක වවුචර්පත් බෙදාදීමට පියවර ගෙන තිබෙනවා.
මෙහිදී අදහස් පළ කළ කෘෂිකර්ම අමාත්යවරයා සඳහන් කළේ මෙම පොහොර වවුචරවලින් රසායනික පොහොර හෝ කාබනික පොහොර රාජ්ය අංශයෙන් හෝ පුද්ගලික අංශයෙන් මිල දී ගත හැකි බවයි.
එමෙන්ම රසායනික පොහොර මිලදී ගැනීමේ දී බන්ඩි පොහොර මිල දී ගැනීම සදහා ප්රමුඛත්වය ලබා දෙන්නැයි ද අමාත්යවරයා ගොවිජනතාවගෙන් ඉල්ලීමක් කර සිටියා.
යුරියා පොහොර කෙතරම් යෙදුවත් අස්වනු සරු නොවන බවත්, ඉහළ අස්වැන්නක් ලබා ගැනීමට නම් MOP හෙවත් මඩපොහොර යෙදීම අනිවාර්ය බව කෘෂි විශේෂඥයින් අවධාරණය කර ඇතැයි ද අමාත්යවරයා සඳහන් කළා.
