බංග්ලාදේශයේ ස්වදේශ කටයුතු උපදේශක ලුතිනන් ජෙනරාල් (විශ්රාමික) ජහන්ගීර් අලම් චෞද්රි, කග්රචාරි කඳුකර දිස්ත්රික්කයේ නොසන්සුන්තාවයට නවදිල්ලියේ සම්බන්ධය ගැන එල්ල කරන චෝදනා ඉන්දියාව මුලුමනින්ම ප්රතික්ෂේප කර තිබෙනවා.
බංග්ලාදේශ බලධාරීන්ට “නීතිය හා සාමය පවත්වා ගැනීමට නොහැකි” බවත් ඒ වෙනුවට වෙනත් පාර්ශ්වයකට දොස් පැවරීමේ ප්රවණතාවක් ඇති බවත් ඉන්දියාව පවසනවා.
බංග්ලාදේශයේ ස්වදේශ කටයුතු උපදේශකවරයාගේ චෝදනා සම්බන්ධයෙන් ප්රතිචාර දක්වමින් ඉන්දියාවේ විදේශ කටයුතු අමාත්යාංශයේ ප්රකාශක රන්ධීර් ජයිස්වාල් මේ බව සඳහන් කළා.
චිතගොං කඳුකර ප්රදේශවල සුළුතර ප්රජාවන්ට එරෙහිව ප්රචණ්ඩත්වය, ගිනි තැබීම් සහ ඉඩම් අත්පත් කර ගැනීම් සිදු කරන ප්රාදේශීය අන්තවාදීන්ගේ ක්රියාවන් පිළිබඳව ස්වයං විමර්ශනයක් කර බරපතල පරීක්ෂණ පවත්වන ලෙස ඔහු ඩකා බලධාරින්ගෙන් ඉල්ලා සිටියා.
ගෝත්රික ගැහැණු ළමයෙකු සමූහ දූෂණයට ලක් කිරීමේ චෝදනාවෙන් පසු ගෝත්රික ප්රජාවන් සහ බෙංගාලි පදිංචිකරුවන් අතර ගැටුම් ඇති වූ පසුගිය ඉරිදා සිට කග්රචාරි දිස්ත්රික්කයේ නොසන්සුන්කාරී තත්ත්වයන් ඇතිව තිබෙනවා.
ගැටුම් හේතුවෙන් අවම වශයෙන් පුද්ගලයින් තිදෙනෙකු මිය ගොස් තවත් බොහෝ පිරිසක් තුවාල ලැබූවා.
ඒ අතර හමුදා නිලධාරීන් 13 දෙනෙකු සහ පොලිස් නිලධාරීන් තිදෙනෙකු ද වනවා.
බලයෙන් පහ කරන ලද බංග්ලාදේශ අගමැතිනි ෂෙයික් හසීනා සහ ඉන්දියාව කලාපයේ නොසන්සුන්තාවයට වගකිව යුතු යැයි පැවසීමට බංග්ලාදේශයේ ස්වදේශ කටයුතු උපදේශක ලුතිනන් ජෙනරාල් (විශ්රාමික) ජහන්ගීර් අලම් චෞද්රි උත්සාහ කර තිබුණා.
