පොළොන්නරුව වැලිකන්ද ප්‍රදේශයේ නිවසක ගෙවත්තක් තුළ නිධානයක් ගැනීමට කැණීම් කළ පොලිස් කොස්තාපල්වරයෙකු ඇතුළු පුද්ගලයන් 5 දෙනෙකු ඊයේ (3දා) දින අලුයම අත්අඩංගුවට ගත් බව වැලිකන්ද පොලිසිය කියයි. මෙම වැටලීම සිදුකර ඇත්තේ වැලිකන්ද පොලිස් බුද්ධි විශේෂ කාර්යාංශයේ නිලධාරීන්ගේ තොරතුරක් අනුව වැලිකන්ද පොලිසිය විසිනි වැලිකන්ද අංක 101, මොනරතැන්න යන ලිපිනය සහිත ඉඩම තුළ නිධානයක් ගැනීමට උත්සාහ කරමින් කැණීම් කර සිටියදී පොලිසිය විසින් මෙම පිරිස සහ කැණීම් කරන ලද උපකරණ ඇතුළු පූජා භාණ්ඩ අත්අඩංගුවට ගෙන තිබේ. කඩවත පදිංචි තිදෙනකුත් රාගම සහ මුල්ලේරියාවේ දෙදෙනකුත් වැලිකන්ද මොනරතැන්න අයෙකුත් අත්අඩංගුවට පත්ව තිබේ.
ඒ අතර පොලිස් කොස්තාපල්වරයා සහ කපු තැනැත්තිය ලෙස සිටි කාන්තාව කඩවත පදිංචිකරුවන් බව පොලිසිය අනාවරණය කරගෙන තිබේ.අත්අඩංගුවට ගත් උපකරණ අතර උදලු, කටු මිටි සහ පූජා භාණ්ඩ උපකරණ රැසක් තිබී ඇත. පොළොන්නරුව ප්‍රදේශය භාර ජ්‍යෙෂ්ඨ පොලිස් අධිකාරි ඔෂාන් හේවාවිතාරණ මහතාගේ උපදෙස් පරිදි වැලිකන්ද පොලිස්ථානයේ වැඩ බලන ස්ථානාධිපති පොලිස් පරීක්ෂක අසේල සරත් කුමාර, පොලිස් සැරයන් සෙනෙවිරත්න (6223) පොලිස් කොස්තාපල් (62607) යන නිලධාරීන් විසින් පොලිස් බුද්ධි විශේෂ කාර්යාංශයේ නිලධාරීන්ගේ තොරතුරක් මත මෙම වැටලීම සිදුකර සැකකරුවන් අත්අඩංගුවට ගෙන තිබේ. අත්අඩංගුවට ගත් සැකකරුවන් සහ උපකරණ ඊයේ පොළොන්නරුව අධිකරණයට ඉදිරිපත් කිරීමට නියමිතව තිබූ බව වැලිකන්ද පොලිසිය පවසයි.
