මුල්ලේරියාව සල්මල් උයන ප්‍රදේශයේදී පොලිස් කොස්තාපල්වරයෙකුට වෙඩි තැබීමට උත්සහ දැරීමේදී අත්අඩංගුවට ගත් සැකකරුවෙකුට යතුරු පැදියක් ලබාදුන් පුද්ගලයකු පානදුර හොරේතුඩුව ප්‍රදේශයේ නිවසකදී පොලිස් විශේෂ කාර්ය බළකාය විසින් අත්අඩංගුවට ගෙන තිබෙනවා.
සැකකරු සමඟ අඩි දෙකක් පමණ දිගැති මන්නා පිහි දෙකක් ද සොයාගෙන ඇති බවයි අප වාර්තාකරු සඳහන් කළේ.
පසුගිය 19 වනදා මුල්ලේරියාව පොලිසිය සිදු කළ විශේෂ සෝදිසි මෙහෙයුමකදී සැක කටයුතු තී රෝද රථයක් නවතා එහි සිටි පුද්ගලයෙකු පරීක්ෂාවට ලක් කිරීමේදී එම පුද්ගලයා සඟවාගෙන සිටි ගිනි අවියකින් පොලිස් කොස්තාපල්වරයෙකුට වෙඩි තැබීමට උත්සාහ කර තිබුණා.
වහා ක්‍රියාත්මක වූ පොලිස් නිලධාරීන් එය වළක්වා සැකකරු අත්අඩංගුවට ගනු ලැබුවා.
එම සැකකරු මනුෂ්‍ය ඝාතන, කොල්ලකෑම සහ වෙඩි තැබීම් රැසකට සම්බන්ධ වරෙන්තු හයක් ඇති අපරාධ 28කට සම්බන්ධ පුද්ගලයෙක් බව පොලිසිය ප්‍රකාශ කර තිබෙනවා.
මෙම සැකකරු සම්බන්ධයෙන් කළ විමර්ශනවලට අනුව පොලිස් විශේෂ කාර්ය බලකාය සිදු කළ වැටලීමකදී ඔහුට යතුරුපැදිය ලබාදුන් පුද්ගලයා මන්නා පිහි දෙක සමග අත්අඩංගුවට ගනු ලැබුවා. ඔහු 44 හැවිරිදි පුද්ගලයෙක්.
