බස් රථවල මගින්ට හිරිහැරවන ආකාරයට මුදල් එකතු කරමින් සිටියදී අත් අඩංගුවට ගැනීමට යාමේදී පොලිස් නිලධාරින්ගෙන් මිදී මුහුදට පනිනු ලැබූ සැකකරු ලබන 21 වනදා දක්වා රක්ෂිත බන්ධනාගාර ගත කර තිබෙනවා.
සැකකරු අත්අඩංගුවට ගෙන ගාල්ල ප්රධාන මහේස්ත්රාත් හමුවට ඉදිරිපත් කිරීමෙන් අනතුරුවයි මෙම නියෝගය ලබාදුන්නේ.
සැකකරු පොලිස් අත්අඩංගුවෙන් මිදී මුහුදට පැන තිබූ අතර පසුව පොලිස් නිලධාරියෙකු මුහුදට පැන සැකකරු අත් අඩංගුවට ගනු ලැබුවා.
මෙලෙස රක්ෂිත බන්ධනාගාර ගත කරනු ලැබුවේ ඇඹිලිපිටිය වැව්සිරිගම ප්රදේශයේ පදිංචි 19 හැවිරිදි සැකකරුවෙක්.
මෙම සැකකරු ඥාති සොහොයුරෙක් සහ තවත් අයෙක් සමග ගාල්ල බස් නැවතුම්පොලේ බස් රථවලට නැග කුඩා ළමයෙකුගේ ඡායාරුපයක් සහිත ටිකට් පත් මගින්ට බෙදාදි එම ළමයා දරුණු වකුගඩු ආබාධයකින් පෙළෙන බැවින් එය සුවපත් කර ගැනිමට බව පවසා මුදල් එකතු කර තිබෙනවා.
මෙසේ මුදල් එකතු කිරිම තමන්ට හිරිහැරයක් බවට මගීන් විසින් බස් නැවතුම්පොලේ රාජකාරි කරමින් සිටි පොලිස් නිලධාරියෙකුට පවසා ඇතැයි සඳහන්.
ඒ අනුව පොලිසිය බස් රථයට නැග පරීක්ෂා කිරිමට සුදානම්වු අවස්ථාවේ ටිකට් පොත් රැගෙන අනෙක් දෙදෙනා පළා ගොස් ඇති අතර මෙම සැකකරු අත් අඩංගුවට ගෙන තිබෙනවා.
සැකකරු පොලිස් ස්ථානය වෙත රැගෙන එමින් සිටියදී පොලිස් අත් අඩංගුවෙන් මිදී දිව ගොස් මහජන පොල පසුපසින් මුහුදට පැන ඇති බවයි අප වාර්තාකරු සඳහන් කළේ.
සැකකරු පිටුපස දිවගිය සැරයන්වරයා ද වහාම මුහුදට පැන සැකකරු අල්ලාගෙන පොලිසියේ විවිධ පැමිණිලි අංශයට බාරදි තිතිබෙනවා.
සිද්ධිය සම්බන්ධයෙන් ගාල්ල පොලිසිය වැඩිදුර පරීක්ෂණ විසින් සිදු කරනවා.
