ශ්‍රී ලංකා පොදුජන පෙරමුණේ මහ ලේකම්, හිටපු පාර්ලිමේන්තු මන්ත්‍රී සාගර කාරියවසම් විසින් පොලිස්පති ප්‍රියන්ත වීරසූරිය සම්බන්ධයෙන් සිදු කළ ප්‍රකාශය සහ ඒ තුළින් ඒ ඔහුට තර්ජනයක් සිදු කිරීම සම්බන්ධයෙන් අද (06) මධ්‍යම අපරාධ විමර්ශන ඒකකය කඩුවෙල අධිකරණයට කරුණු වාර්තා කළා.
එහිදී එම ඒකකයේ අධ්‍යක්ෂ සහකාර පොලිස් අධිකාරි කමල් ආරියවංශ කියා සිටියේ සිද්ධිය සම්බන්ධයෙන් වැඩිදුර විමර්ශන කටයුතු කරන බවත් ඒ සඳහා අධිකරණයේ අවසරය ලබා දෙන ලෙසයි.
ඒ, අනුව කඩුවෙල ප්‍රධාන මහෙස්ත්‍රාත් අරුණ ඉන්ද්‍රජිත් බුද්ධදාස මහතා ඒකී අවසරය ලබා දුන්නා.
එමෙන්ම සිද්ධිය වාර්තා කළ මාධ්‍ය නාළිකාවලට එම ප්‍රකාශය සම්බන්ධයෙන් සංස්කරණය නොකළ දර්ශන තැටි ලබා දෙන ලෙස නියෝගයක් නිකුත් කරන ලෙස ද ඉල්ලා සිටියා.
ඒ, අනුව ඊට ද අවසරය හිමි වුණා.
එහිදී මධ්‍යයම අපරාධ විමර්ශන ඒකකය ඉල්ලා සිටි සියලුම නියෝග ලබා දුන් අතර මහෙස්ත්‍රාත්වරයා විමර්ශන ප්‍රගතිය සැප්තැම්බර් 24 අධිකරණයට ඉදිරිපත් කරන ලෙසද නියෝග කළා.
වත්මන් පොලිස්පති ප්‍රියන්ත වීරසූරිය ආණ්ඩුවට සේවය කිරීම නවතා රජයට සහ ජනතාවට සේවය කළ යුතු බවත්, මහපාරේ මිනිස්සුන්ගෙන් ගුටි කෑම නිසා මියගිය 37 වන පොලිස්පතිවරයා ලෙස ප්‍රියන්ත වීරසූරිය ඉතිහාසගත වනවාට තමන් අකැමැති බවත් හිටපු පාර්ලිමේන්තු මන්ත්‍රී සාගර කාරියවසම් මාධ්‍ය හමුවකදී ප්‍රකාශ කර තිබුණා.
