පසුගිය 09 වනදා ගාලුමුවදොර අරගලකරුවන්ට පහරදුන් සිද්ධිය සම්බන්ධයෙන් පොලිස්පති සී.ඩී. වික්‍රමරත්න පසුගිය දා (21) අපරාධ පරීක්ෂණ දෙපාර්තමේන්තුව හමුවේ ප්‍රකාශ ලබා දුන්නා.
එහිදී පොලිස්පතිවරයා පැය 05කට ආසන්න කාලයක් ප්‍රකාශ ලබාදුන් බවයි වාර්තා වුණේ.
ඉකුත් 09 වනදා යම් ගැටුම්කාරී තත්ත්වයක් උද්ගත වුවහොත් එය වළක්වා ගන්නා ලෙසට එදින උදෑසන සහ ඊට පෙර දිනයේදීත් තමන් විසින් බස්නාහිර පළාත භාර ජ්‍යේෂ්ඨ නියෝජ්‍ය පොලිස්පති දේශබන්දු තෙන්නකෝන්ට උපදෙස් ලබාදුන් බවයි පොලිස්පතිවරයා ප්‍රකාශ ලබාදෙමින් සඳහන් කර ඇත්තේ.
එහිදී පොලිස්පතිවරයා වැඩිදුරටත් සඳහන් කරඇත්තේ තමන් විසින් ලබාදුන් කිසිඳු උපදෙසක් බස්නාහිර පළාත භාර ජ්‍යේෂ්ඨ නියෝජ්‍ය පොලිස්පතිවරයා පිළිපැද නොමැති බවයි.
තමන් කිසිඳු අවස්ථාවක ප්‍රචණ්ඩත්වය පාලනයට පියවර නොගන්නා ලෙස තමන් කිසිම අවස්ථාවක උපදෙස් නොදුන් බව අපරාධ පරීක්ෂණ දෙපාර්තමේන්තුව හමුවේ ප්‍රකාශ ලබාදෙමින් පොලිස්පතිවරයා වැඩිදුරටත් පවසා තිබෙනවා.
අපරාධ නඩු විධාන සංග්‍රහයේ ප්‍රතිපාදන සහ පොලිස් නියෝගවලට අනුව මෙවැනි ගැටුම්කාරී තත්ත්වයකදී එය පාලනයට පියවර ගත යුත්තේ එම ස්ථානයේ සිටින ජ්‍යේෂ්ඨතම පොලිස් නිලධාරියා බවයි ඔහු සිහිපත් කර ඇත්තේ.
ඔහු වැඩිදුරටත් පවසා ඇත්තේ මහජන පීඩාවක් හෝ කැළඹීමක් ඇතිවන අවස්ථාවක එය පාලනය කිරීමට පියවර ගත යුත්තේ පොලිස්පතිවරයා හෝ අමාත්‍යංශ ලේකම්වරයා නොව එම ස්ථානයේ සිටින ජ්‍යේෂ්ඨතම පොලිස් නිලධාරියා බවයි.
ඒ අනුව පසුගිය 09 වනදා සිදුවීම සිදුවූ දිනයේ එම ස්ථානයේ සිටි ජ්‍යේෂ්ඨතම පොලිස් නිලධාරියා වූ දේශබන්දු තෙන්නකෝන් මෙම ප්‍රචණ්ඩකාරී සිදුවීම වළක්වා ගැනීමට කටයුතු නොකිරීම තුළ සිය වගකීම් පැහැර ඇති බවයි පොලිස්පතිවරයා සඳහන් කර ඇත්තේ.
