රටට ඉදිරි මාස කිහිපයට අවශ්‍ය කරන පොල් ගෙඩි සඳහා එය ආනයනය කිරීමට රජයෙන් අවසර ඉල්ලා තිබෙනවා.
පොල් කර්මාන්ත මණ්ඩලය පැවසුවේ පොල්ගෙඩි මිලියන 200ක් ආනයනය කිරීමට රජයෙන් විශේෂ ඉල්ලීමක් සිදුකර ඇති බවයි.
පොල් ආශ්‍රිත, නිෂ්පාදන අපනයන කර්මාන්ත අංශය සඳහා අවශ්‍ය පොල් තොග කඩිනමින් ආනයනය කිරීමට කටයුතු නොකළහොත් ඩොලර් බිලියනයක පමණ ආදායමක් රටට අහිමි වනු ඇති බවයි එහි සභාපති ජයන්ත සමරකෝන් මහතා පවසනවා.
මේ වනවිට රට තුළ සහ වෙළෙඳපොළ තුළ ඇති පොල් හිඟයට ප්‍රධානතම හේතුව පොහොර මිල ගණන් ඉහළ යාම බවයි එහි සභාපතිවරයා පැවසුවේ.
මෙරට වාර්ෂික දළ පොල් ගෙඩි නිෂ්පාදනය ගෙඩි මිලියන 3,000ක් වූවත්, ඉකුත් වසරේ දී එය පොල් ගෙඩි මිලියන 2,680 ක් දක්වා අඩු වී තිබෙන බවත්, මේ වසරේ දී මෙරට පොල් නිෂ්පාදනය ගෙඩි මිලියන 2400 – 2600 අතර ප්‍රමාණයක් දක්වා අඩුවන බවට පොල් පර්යේෂණ ආයතනය පුරෝකථනය කර ඇති බවයි ඔහු වැඩිදුරටත් සඳහන් කළේ.
