ඊයේ (24) පස්වරුවේ ස්ථාන දෙකකින් මාරක රිය අනතුරු වාර්තා වී ඇති අතර එම අනතුරුවලින් තිදෙනකු ජීවිතක්ෂයට පත් ව තිබෙනවා.
පොලිස් මාධ්‍ය ප්‍රකාශක කාර්‍යාලය නිවේදනය කළේ ඉන් එක් අනතුරක් ඊයේ (24) සවස් කාලයේ දී බිංගිරිය පොලිස් වසමේ තාරණ පඩිවෙල මාර්ගයේ උඩවෙල පාලම අසල දී සිදු ව ඇති බවයි.
තාරණ දෙස සිට උඩවෙල දෙසට ධාවනය වූ ලොරි රථයක් එම දිශාවටම ධාවනය වූ යතුරුපැදියක පිටුපස ගැටී අනතුරක් සිදු ව තිබෙනවා.
අනතුරින් පැදිකරු බරපතළ තුවාල ලබා කුලියාපිටිය රෝහලට ඇතුළත් කිරීමේ දී මියගොස් තිබෙන බවයි පැවසෙන්නේ.
මියගොස් ඇත්තේ 44 හැවිරිදි තාරණ උඩවෙල ප්‍රදේශයේ පදිංචිකරුවෙක්.
මේ අතර ඊයේ රාත්‍රි කාලයේ දී පොල්ගහවෙල – අලව්ව මාර්ගයේ මැද්දලන්ද ප්‍රදේශයේ දී අලව්ව දෙස සිට පොල්ගහවෙල දෙසට ධාවනය වූ යතුරුපැදියක් මාර්ගයේ නවතා තිබූ කන්ටේනර් රථයක ගැටී අනතුරක් සිදු වුණා.
අනතුරින් පැදිකරු හා පසුපැදිකරු බරපතළ තුවාල ලබා පොල්ගහවෙල රෝහලට ඇතුළත් කිරීමේ දී දෙදෙනාම මියගොස් ඇති බවයි වාර්තා වන්නේ.
මරණකරුවන් 45-48 හැවිරිදි වියෙහි පසුවනවා.
සිද්ධිය සම්බන්ධයෙන් පොලිස් විමර්ශන ක්‍රියාත්මකයි.
