පිටකොටුව මධ්‍යම බස් නැවතුම්පොළේ දී ලංගම බස් රථයක පිටුපස රෝදයට හිස තබා තරුණයකු සිය දිවි හානි කරගන ඇතැයි පිටකොටුව පොලිසිය පවසනවා.
මෙම තරුණයා අම්පාර – සයින්දමරුදු ප්‍රදේශයේ තරුණයකුගේ ජාතික හැඳුනුම්පතක් ද සන්තකයේ තබාගෙන සිට ඇති බවයි වාර්තා වන්නේ.
මෙලෙස මියගොස් ඇත්තේ වයස අවුරුදු 30ක පමණ තරුණයකු වන අතර අනන්‍යතාව මෙතෙක් හඳුනාගෙන නැහැ.
මහනුවර උතුර ඩිපෝවට අයත් මෙම ලංගම බස් රථය ඊයේ (03) පස්වරු 4.00ට පමණ ගමන් ආරම්භ කිරීමට සූදානම් ව බස් රථය පණ ගන්වා ධාවනය කිරීමට සූදානම් වූ අවස්ථාවේ තරුණයා බස් රථයේ පිටුපස දකුණු පස රෝදයට හිස තබා ඇති බවයි වාර්තා වන්නේ.
මොහු බස්රථය තුළට රිංගා මෙලෙස සියදිවි හානි කරගෙන ඇති බවට සිදුකළ විමර්ශනයේදී හෙළි වූ බව පොලිසිය පැවසුවා.
සිද්ධියෙන් බරපතළ තුවාල ලැබූ තරුණයා කොළඹ ජාතික රෝහලට ඇතුළත් කරන අවස්ථාදීත් මියගොස් සිට තිබෙනවා.
මොහු කිසියම් මත්ද්‍රව්‍යයකට තදින්ම ඇබ්බැහි වී සිටින්නෙකු බව ද පොලිසිය පවසන බවයි දසත ප්‍රාදේශීය වාර්තාකාරිණිය සඳහන් කළේ.
මෙම තරුණයා අත තිබූ ජාතික හැඳුනුම්පතේ ලිපිනයට අනුව සයින්ද මරුදු ප්‍රදේශයේ නිවසට ගොස් පොලිසිය පරීක්ෂණ පැවැත්වීමේ දී, එම ජාතික හැඳුනුම්පත අයිති තරුණයා එම නිවසේ සිට ඇති අතර, ඔහු පවසා ඇත්තේ තමාගේ පසුම්බිය කොළඹ බස් රථයක් තුළ දී කිසිවකු විසින් සොරාගෙන ගොස් ඇති බවයි.
ඒ අනුව මෙම තරුණයා බස් රථවල මගීන්ගේ මුදල් පසුම්බි ඇතුළු දේපළ සොරාගන්නා පුද්ගලයෙකු විය හැකි බවට ද සැක කෙරෙනවා.
