පාස්කු ප්‍රහාරය සම්බන්ධයෙන් සිදුකරන විමර්ශනවලට දේශපාලන අතගැසීම් සිදුවන්නේ නම්, එය පාස්කු වින්දිතයින්ට සිදුකරන බලවත් අසාධාරණයක් බව කොළඹ අගරදගුරු පදවියේ ජනසන්නිවේදක සහ මාධ්‍ය ප්‍රකාශක සිරිල් ගාමිණී පියතුමා පවසනවා.
අද (08) පෙරවරුවේ මාධ්‍ය හමුවක් කැඳවමින් සිරිල් ගාමිණී පියතුමා මේ බව සඳහන් කළේ.
මෙහිදී අදහස් දක්වමින් පියතුමන් සඳහන් කර සිටියේ, රට තුළ පවතින ඇතැම් ක්‍රියාවලි හරහා පාස්කු ප්‍රහාරයේ විමර්ශනවල යම් බාධාවක් මතුවෙනු ඇතැයි සැකයක් පවතින බවයි.
“කිසිම විදියකින් කිසිම දේශපාලන පක්ෂයක් හෝ දේශපාලකයෙක් හෝ මේ විමර්ශනවලට ඇඟිලිගහන්න ඕන නෑ. මේ රටේ නීත්‍යානුකුල විමර්ශන කණ්ඩායම් තියෙනවා. ඒ අය මේ ගැන විමර්ශන සිදුකරගෙන යනවා. එතකොට ඒ විමර්ශන කරගෙන යන්න ඒ අයට අනිවාර්යෙන් පහසුකම් සැපයීම සහ නිදහසේ එම විමර්ශන කරගෙන යන්න උදව් කිරීම තමයි හැම කෙනෙකුගේමේ යුතුකම සහ වගකීම. ඒ නිසා එම විමර්ශනවලට කවුරුහරි බාධා කරනවා නම් ඒක වින්දිතයින්ට කරන අසාධාරණයක්.”
