පාර්ලිමේන්තුවේ ආහාරපානවල සෞඛ්යාරක්ෂිත බව වැඩි කිරීමට අදාළව යෝජනා ඉදිරිපත් කිරීම සඳහා කමිටුවක් පත් කිරීමට කතානායක ජගත් වික්රමරත්නගේ ප්රධානත්වයෙන් පැවති ගෘහ්ය කාරක සභාවේදී තීරණය වී තිබෙනවා.
කතානායකවරයාගේ ඉල්ලීම පරිදි බත්තරමුල්ල සෞඛ්ය වෛද්ය නිලධාරීවරයාගේ ප්රධානත්වයෙන් මහජන සෞඛ්ය පරීක්ෂකවරුන් විසින් පාර්ලිමේන්තු පරිශ්රයේ ආහාරපාන පිළියෙල කිරීමට අදාළ මුළුතැන්ගෙය ඇතුළු ස්ථාන පරීක්ෂා කිරීම පසුගිය අප්රේල් මාසයේ දී සිදු කෙරුණා.
ඒ, අනුව ඊට අදාළ නිරීක්ෂණ ඇතුළත් වාර්තාව මහජන සෞඛ්ය පරීක්ෂකවරුන් විසින් ගෘහ්ය කාරක සභාවට සවිස්තරාත්මකව ඉදිරිපත් කිරීම මෙහිදී සිදුවුණා.
මෙහිදී අදහස් දක්වමින් බත්තරමුල්ල සෞඛ්ය වෛද්ය නිලධාරී වයි.බී ඉන්දික පැවසුවේ බත්තරමුල්ල ප්රදේශයේ රාජ්ය ආයතන 150 කට ආසන්න ප්රමාණයක ආහාර සුරක්ෂිතතාව සම්බන්ධයෙන් විමර්ශනය කළ ද පාර්ලිමේන්තුවේ ආහාරවල සුරක්ෂිතබව පිළිබඳ නිරීක්ෂණයට එක්වූයේ පළමු වරට බවයි.
ඒ සඳහා මැදිහත් වූ කතානායකවරයාට ස්තූතිය පළ කරන බව ද ඔහු පැවසුවා.
ඒ අනුව පාර්ලිමේන්තුවේ ආහාර අමුද්රව්ය ලබාගැනීමේ සිට ආහාර නිෂ්පාදනය, ගබඩාකිරීම සහ පිළිගැන්වීම පිළිබඳව සිදුකළ විමර්ශනයේ වාර්තාවක් කතානායකවරයාට ලබා දුන් බව ද ඔහු සඳහන් කළා.
පාර්ලිමේන්තු මන්ත්රීවරයන්, විදෙස් රාජ්ය තාන්ත්රිකයන්, රාජ්ය නිලධාරීන්, ආරක්ෂක අංශ ඇතුළු අනෙකුත් සේවකයන් සඳහා ආහාරපාන පාර්ලිමේන්තුව විසින් සැපයීම සිදුකරන පාර්ලිමේන්තුවේ ආහාරපානවල සෞඛ්යාරක්ෂිත බව තහවුරු කිරීමේ අවශ්යතාව මෙහිදී කතානායකවරයා විසින් අවධාරණය කරනු ලැබුවා.
ඒ, අනුව පාර්ලිමේන්තුවේ ආහාරපාන අංශයේ පවතින යටිතල පහසුකම්වල අඩුපාඩු මෙන්ම අනෙකුත් ගැටලු කඩිනමින් මඟහරවා ගැනීමට අදාළ යෝජනා සකස් කිරීම පිණිස මෙම කමිටුව පත් කරන බව කතානායකවරයා මෙහිදී සඳහන් කළා.
ඒ, අනුව ප්රදේශය භාර සෞඛ්ය වෛද්ය නිලධාරීවරයා, මහජන සෞඛ්ය පරීක්ෂකවරුන් සහ රාජ්ය ඉංජිනේරු සංස්ථාවේ මුළුතැන්ගෙය කටයුතු පිළිබඳ විශේෂඥ දැනුමැති ඉංජිනේරුවෙකු /ගෘහ නිර්මාණ ශිල්පියෙකු, පාර්ලිමේන්තුවේ ආහාරපාන හා ගෘහ පාලන සේවා අධ්යක්ෂවරයා සහ පාර්ලිමේන්තුවේ සම්බන්ධීකරණ ඉංජිනේරුවරයා මෙම කමිටුවට ඇතුළත් විය යුතු බවට ද මෙහිදී යෝජනා වුණා.
මීට අමතරව මාදිවෙල පාර්ලිමේන්තු මන්ත්රීවරයන්ගේ නිල නිවාසවල පවතින සේවා සැපයීම්, නඩත්තු කටයුතු ඇතුළු කරුණු පිළිබඳව ද මෙම කාරක සභාවේදී අවධානය යොමුවුණා.
ඒ, සම්බන්ධයෙන් පවතින අඩුපාඩු කඩිනමින් නිරාකරණය කිරීමට පියවර ගන්නා ලෙස ද කතානායකවරයා අදාළ නිලධාරීන්ට උපදෙස් ලබා දුන්නා
