හොරණ ගුරුගොඩ සමෘද්ධි බැංකුව අසල දී අද පස්වරුවේ සිදු වූ අනතුරකින් යතුරුපැදියක ගිය දෙදෙනෙකු බරපතළ තුවාල ලබා රෝහල් ගත කර තිබෙනවා.
මෝටර් රථයක් සහ යතුරුපැදියක් එකිනෙක ගැටීමෙනුයි මෙම අනතුර සිදු වී ඇත්තේ.
යතුරුපැදිය සහ මෝටර් රථය එකිනෙක ගැටීමත් සමඟම ගිනි ගැනීමට ලක්ව ඇති අතර ප්‍රදේශවාසීන් මැදිහත්ව ගින්න නිවා දමා තිබෙනවා.
යතුරුපැදියේ පසුපස ගමන් ගත් පුද්ගලයා අනතුරත් සමග මීටර් පහළොවක් පමණ උඩින් විසිවී ගොස් ප්‍රතිවිරුද්ධ දිශාවේ ඇති වෙළඳසැලක වහලය මත පතිත වී ඇතැයි සඳහන්.
පැදිකරු කම්බි වැටක් මතින් විසිවී ගොස් අසල ඉඩමකට වැටී ඇති බවයි අප වාර්තාකරු කියාසිටියේ.
මෝටර් රථය මීවනපලාන සිට ගුරුගොඩ දෙසට පැමිණෙමින් සිට ඇති අතර වංගුවක් සහිත ස්ථානයක දී විරුද්ධ දිශාවෙන් පැමිණි යතුරුපැදිය මෝටර් රථයේ මුහුණට මුහුණ ගැටී තිබෙනවා.
යතුරුපැදිය පැදවූ පුද්ගලයාගේ අපරික්ෂාකාරී රිය ධාවනය අනතුරට හේතුව බව පොලිසිය ප්‍රකාශ කර තිබෙනවා.
පසු පැදිකරු පෝරුවදණ්ඩ ප්‍රදේශයේ පදිංචි වයස අවුරුදු 21ක් වන තරුණයෙක් වන අතර 21 හැවිරිදි අනෙක් තරුණයා මුණගම පදිංචිකරුවෙක්.
තුවාලකරුවන් දෙදෙනා හොරණ මූලික රෝහල වෙත ඇතුළත් කර තිබෙනවා.
