ජංගම දුරකථන මිල 20% කින් අඩු කළ හැකි බවට ඇතැම් සංගම් පැවසුව ද එම සහනය තවමත් පාරිභෝගිකයන්ට ලබාදීමට හැකියාවක් නොමැති බව සමස්ත ලංකා කොමියුනිකේෂන් හිමිකරුවන්ගේ සංගමය පවසනවා.
එම සංගමයේ සභාපති ඉන්ද්‍රජිත් පෙරේරා කියාසිටියේ ආනයන සීමා ලිහිල් වීම සහ රුපියල ශක්තිමත් වීම හරහා ජනතාවට සහන නොලැබෙන බවට මතයක් පවතින බවයි.
ජංගම දුරකතනවල මිල 20% කින් අඩු කරන බවට ඇතැම් සංගම් ප්‍රකාශ කළ ද තමන් සතුව ඇති දුරකථන මේ වන විට දැන් සියයට දෙතුන් ගුණයකින් වැඩි වී ඇති බවයි සභාපතිවරයා පෙන්වා දෙන්නේ.
මිල අඩුවට තිබු දුරකථන රජය ගත් එක් තීන්දුවක් හේතුවෙන් එක් රැයකින් විශාල ලෙස වැඩි වූ බව ද ඔහු ප්‍රකාශ කරනවා.
එබැවින් දුරකථන අඩුවීමේ වාසිය නුදුරේදීම ජනතාවට ලබාදීමට නොහැකි බවත් තමන් සතුව ඇත්තේ වැඩි මිලට මිලදී ගත් දුරකථන බවත් ඔහු ප්‍රකාශ කළා.
එම තොග තවමත් පවතින අතර මිල අඩු කිරීමට නොහැකි වීම පිළිබඳ ජනතාවගෙන් සමාව අයදින බවයි සමස්ත ලංකා කොමියුනිකේෂන් හිමිකරුවන්ගේ සංගමය කියාසිටියේ.
ජංගම දුරකථන ආනයන සහ විකුණුම්කරුවන්ගේ සංගමය ඊයේ ප්‍රකාශ කළේ ඩොලරයට සාපේක්ෂව රුපියල ශක්තිමත් වීම හේතුවෙන් ජංගම දුරකථන මිල අඩු වන බවයි.
එහි සභාපති සමිත් සෙනරත් මහතා සඳහන් කළේ ජංගම දුරකථන සහ උපාංගවල මිල 20%කින් පමණ අඩු වන බවයි.
දිවයින පුරා පවතින තොග අවසන් වීමත් සමඟ ජනතාවට එම සහනය ලබාදීමට හැකි බව ද ඔහු සඳහන් කළා.
දිවයින පුරා සිටින සාමාජිකයින්ගේ ඒකමතික තීරණයකට අනුව මෙම මිල අඩු කිරීමේ තීරණයට එළඹි බවයි සභාපතිවරයා කියාසිටියේ.
