ගතවු පැය 24 තුළ දිවයින පුරා යුක්ති මෙහෙයුම්වලින් අපරාධකරුවන් 697ක් අත්අඩංගුවට ගෙන තිබෙනවා.
මත්ද්‍රව්‍ය වැරදි සම්බන්ධ සැකකරුවන් 559ක් සහ අපරාධ අංශ වෙත යොමු කළ ලැයිස්තුවේ සිටි සැකකරුවන් 138ක් ඊට අයත්.
මත්ද්‍රව්‍ය වැරදි සම්බන්ධ අත්අඩංගුවට ගත් සැකකරුවන් 559 දෙනා අතර, පොලිස් මත්ද්‍රව්‍ය නාශක කාර්යංශය සහ පොලිස් විශේෂ කාර්යංශයේ ලැයිස්තුවේ සිටි සැකකරුවන් 06ක්, පුනරුත්ථාපන මධ්‍යස්ථාන වෙත යොමු කරන ලද එක් සැකකරුවෙක් සහ රැදවුම් නියෝග මත රඳවා ගෙන විමර්ශනය සිදුකරන පුද්ගලයින් 03ක් සිටී.
එසේම, අපරාධ අංශ වෙත යොමු කළ ලැයිස්තුවේ අත්අඩංගුවට ගත් සැකකරුවන් 138 දෙනා අතරින් මත්ද්‍රව්‍ය වැරදි සම්බන්ධව විවෘත වරෙන්තු නිකුත්ව සිටි සැකකරුවන් 12ක්, මත්ද්‍රව්‍ය නොවන වැරදි සම්බන්ධව විවෘත වරෙන්තුකරුවන් 106ක් සහ අපරාධවලට අවශ්‍ය කරන සැකකරුවන් 15ක් හා ඇඟිලි සළකුණු ඔස්සේ අනාවරණය වී ඇති සැකකරුවන් 05ක් සිටින බව සඳහන්.
දිවයින පුරා සිදුකළ මෙහෙයුම්වල දී හෙරොයින් ග්‍රෑම් 170 මිලිග්‍රෑම් 224ක්, අයිස් ග්‍රෑම් 113 මිලිග්‍රෑම් 351ක්, ගංජා ග්‍රෑම් 814 මිලිග්‍රෑම් 21ක්, මාවා ග්‍රෑම් 55, තූල් ග්‍රෑම් 65ක්, මදන මෝදක ග්‍රෑම් 432ක්, ඈෂ් ග්‍රෑම් 3 මිලිග්‍රෑම් 522ක්, මත්පෙති 137ක් සහ ගංජා පැළ 26,186ක් පොලිස් භාරයට ගෙන තිබෙනවා.
