දිවයිනේ බොහෝ ප්‍රදේශවල අද (20) සවස් කාලයේ දී හෝ රාත්‍රී කාලයේ දී තැනින් තැන වැසි හෝ ගිගුරුම් සහිත වැසි ඇති විය හැකි බව කාලගුණ අංශ නිවේදනය කරනවා.
බස්නාහිර සහ සබරගමුව පළාත්වලත් නුවරඑළිය, ගාල්ල සහ මාතර දිස්ත්‍රික්කවලත් අද (20) උදෑසන කාලයේදීත් වැසි ඇති විය හැකි බවයි කාලගුණ විද්‍යා දෙපාර්තමේන්තුව දැනුම් දුන්නේ.
බස්නාහිර, සබරගමුව, මධ්‍යම, ඌව, උතුරු මැද සහ නැගෙනහිර පළාත්වලත් ගාල්ල සහ මාතර දිස්ත්‍රික්කවලත් ඇතැම් ස්ථාන වලට මිලි මීටර් 50ට වැඩි තරමක් තද වැසි ඇති වීමේ හැකියාව පවතිනවා.
මේ අතර දිවයිනට නිරිත දෙසින් කොළඹ සිට ගාල්ල සහ මාතර හරහා හම්බන්තොට දක්වා වෙරළට ඔබ්බෙන්වන මුහුදු ප්‍රදේශයේ පවතින ක්‍රියාකාරී වළාකුළු පද්ධතිය හේතුවෙන් එම මුහුදු ප්‍රදේශවල තද වැසි ඇති විය හැකි බවත් දැනුම් දෙනවා.
එමෙන්ම එම මුහුදු ප්‍රදේශවල සුළඟේ වේගය ද (පැ.කි.මී. 70-80 පමණ) ඉහළ යා හැකි අතර, එම මුහුදු ප්‍රදේශ රළු වීමේ හැකියාවක් පවතින බවයි අනතුරු අඟවන්නේ.
ඒ, අනුව ධීවර සහ නාවුක ප්‍රජාව මේ සම්බන්ධයෙන් සැලකිලිමත්ව පසුවන ලෙසට ද දැනුම් දෙනවා.
