විදෙස්ගතව සිටින මවගෙන් දුරකථන ඇමතුමක් ලැබී ඇති බව පවසමින් බාලවයස්කාර දැරියක්ව රවටා කාමරයට ගෙන්වාගෙන ඇයට අතවර කළ බවට චොදනා ලැබූ සැකකරුවෙක් දැඩි ඇප කොන්දේසි මත මුදාහැරීමට ගම්පහ මහේස්ත්රාත් අධිකරණය නියෝග කළා.
එහිදී සැකකරුට රුපියල් ලක්ෂ 05ක ශරීර ඇපයක් මත මුදාහැර ඇති අතර, ඇපකරු ළඟම ඥාතියෙකු විය යුතු බවටත් එම ඇපකරුගේ ඥාතීත්වය සහ පදිංචිය ග්රාම නිලධාරී මඟින් සනාථ කළ යුතු බවටත් අධිකරණය මෙහිදී දන්වා තිබෙනවා.
මෙලෙස ඇප නියම කර ඇත්තේ මල්වතුහිරිපිටිය, හේනේගම, ගැටුමාන ප්රදේශයේ පදිංචි තරුණයෙකුට බවයි අප වාර්තාකරු සඳහන් කළේ.
අවුරුදු 14ක් වයසැති දැරියක් සැකකරු විසින් මෙලෙස අතවරයට ලක්කර ඇති අතර, කෙටි පරිවාස වාර්තාව සමඟ එම දැරිය රුපියල් ලක්ෂ 05ක බැඳුම්කරයක් මත ඇයගේ නැන්දා වෙත භාරදීමට ද අධිකරණය නියෝග කර තිබෙනවා.
09 වන ශ්රේණියේ ඉගෙනුම ලබන දැරිය පියා සහ සහෝදරයා සමඟ නිවසේ ජීවත්වන බවත් රාත්රියට නිදාගැනීම සඳහා ඇය නිවස අසල පදිංචි නැන්දාගේ නිවසට යන බවයි පොලිස් විමර්ශන වලදී අනාවරණය වී ඇත්තේ.
දිනක් රූපවාහිනිය නැරඹීම සඳහා රාත්රී කාලයේ අසල්වැසි නිවසකට දැරිය ගොස් ඇති අතර, එම නිවසේ සිටි සැකකරු විදෙස්ගතව සිටින දැරියගේ මව තමන්ගේ ජංගම දුරකථනයට ඇමතුමක් ලබාගෙන ඇති බවට දැරියට පවසා තිබෙනවා.
ජංගම දුරකථනය කාමරයේ ඇති බව පවසා ඇති සැකකරු මව සමඟ කතා කරන ලෙස දන්වා දැරියව කාමරයට කැඳවාගෙන ගොස් ඇයට අතවර කර ඇති බවයි වැඩිදුරටත් කරුණු අනාවරණය වී ඇත්තේ.
දැරියව වෛද්ය පරීක්ෂණයක් සඳහා ගම්පහ මහ රෝහලේ අධිකරණ වෛද්ය නිලධාරී වෙත යොමු කර ඇති අතර, මෙම නඩුව ලබන අප්රේල් 27 වනදා යළි කැඳවීමට නියමිතයි.
