දින කිහිපයක සිට දකුණු කොරියාවේ ශීඝ්‍රයෙන් පැතිර යන ළැව්ගිනි ජාලාව පිළිබඳ ව එරට ශ්‍රමිකයින් වශයෙන් රැඳී සිටින ශ්‍රී ලාංකිකයින්ට විශේෂ නිවේදනයක් නිකුත් කර තිබෙනවා.
දකුණු කොරියාවේ ශ්‍රී ලංකා තානාපති කාර්‍යාලය විසින් නිවේදනයක් නිකුත් කරමින් සඳහන් කරන්නේ මෙම ළැව්ගිනි හේතුවෙන් කිසිදු අනතුරක් ශ්‍රී ලාංකිකයින්ට සිදු ව නොමැති බවයි.
කෙසේවෙතත් කුමන හෝ හේතුවක් මත ළැව්ගිනි පැතිර යන ප්‍රදේශවලට යාමෙන් වළකින ලෙස ශ්‍රී ලංකා තානාපති කාර්‍යාලය ලාංකිකයින්ගෙන් ඉල්ලීමක් කරනවා.
හදිසි අවස්ථාවක දී දකුණු කොරියාවේ සිටින ශ්‍රී ලාංකිකයින්ට තානාපති කාර්යාල අමතන ලෙසත් දැනුම් දී ඇති අතර ඒ සඳහා හදිසි දූරකථන ඇමතුම් අංක ලෙස;
දූරකථන අංක – 2 735 2966, 2 735 2967 හෝ 2 794 2968 ලබා දී තිබෙනවා.
බීබීසී මාධ්‍යයට අනුව දකුණු කොරියානු ළැව්ගින්නෙන් මේ වනවිට එරට පුද්ගලයින් 24 දෙනෙකු ජීවිතක්ෂයට පත් ව ඇති අතර වසර 1,300ක් පැරණි විහාරස්ථානයක් ද මෙම ගින්නෙන් විනාශ වී තිබෙනවා.
දකුණු කොරියාවේ සෝල් ප්‍රදේශයේ පවතින වියළි කාලගුණය සහ තද සුළං හේතුවෙන් ළැව්ගිනි වේගයෙන් පැතිරෙමින් පවතින බවයි වාර්තා වන්නේ.
ගින්නෙන් ගොඩනැගිලි 200කට වැඩි ප්‍රමාණයක් විනාශ වී තිබෙනවා.
තවත් පුද්ගලයින් 27000ක් පමණ අවදානම් සහිත ස්ථානවලින් ඉවත් කරගැනීමේ මෙහෙයුම් ද ක්‍රියාත්මකයි.
දකුණු කොරියාවේ ගිනිකොණදිග කලාප 6ක ඇති වූ ළැව්ගිනි හේතුවෙන් අක්කර 43,330ක් ගිනිගෙන ඇති අතර, පුද්ගලයින් 19 දෙනෙකු තුවාල ලබා රෝහල්ගත කෙරුණා.
