දකුණු ආසි­යානු කනිෂ්ඨ මලල ක්‍රීඩා පිටියේ දී ශ්‍රී ලංකා­වට පද­ක්කම් රැසක් (ඡායාරූප)

04වන දකුණු ආසියානු කනිෂ්ඨ මලල ක්‍රීඩා තරගාවලියට සහභාගී වූ ශ්‍රී ලාංකික ක්‍රීඩක ක්‍රීඩිකාවන් රන් පදක්කම් 09ක්, රිදී පදක්කම් 09ක් සහ ලෝකඩ පදක්කම් 17ක් වශයෙන් සමස්ථ තරගාවලියේ පදක්කම් 35ක් දිනාගෙන අද (14) දින පස්වරුවේ කටුනායක ගුවන් තොටුපොළ වෙත පැමිණියා.

මෙම තරගාවලිය පසුගිය සැප්තැම්බර් 11වනදා සිට 23වනදා දක්වා ඉන්දියාවේ චෙන්නායි නුවර පැවැත්වෙනවා.

එම තරගාවලියේ දී නව දකුණු ආසියානු කනිෂ්ඨ මලල ක්‍රීඩා වාර්තා 05 ක් තැබීමට ද ශ්‍රී ලංකාව නියෝජනය කළ පිරිමි ක්‍රීඩකයින් සමත් වී තිබුණා.

ඒ අතර මීටර් 100, මීටර් 100 × 4 සහාය දිවීම, මීටර් 200, මීටර් 800 සහ උස පැනීමේ ඉසව්වලට සහභාගී වෙමින් ඔවුන් ජයග්‍රහණ අත්පත් කරගෙන තිබෙනවා.

එසේම කොළඹ ආනන්ද විද්‍යාලයේ ටෙරෝන් විජේසිංහ ක්‍රීඩකයා මීටර් 100 සහ මීටර් 100 × 4 ඉසව් සදහා සහභාගි වෙමින් නව දකුණු ආසියානු කළාපයේ වාර්තාවක් තබමින් මෙන්ම කනිෂ්ඨ ශ්‍රී ලංකා වාර්තාවක් ද තබමින් රන් පදක්කම් 02ක් දිනා ගැනීමට සමත් වුණා.

එම විද්‍යාලයේ ඉදුසර ක්‍රීඩකයා ද මීටර් 200 සහ මීටර් 100 × 4 ඉසව් සදහා දකුණු ආසියානු කනිෂ්ඨ මලල ක්‍රීඩා වාර්තාවක් තබමින් රන් පදක්කම් 02ක් දිනා ගැනීමට සමත් ව සිටියා.

මෙම පදක්කම් දිනා ගත් ක්‍රීඩක ක්‍රීඩිකාවන් අද (14) දින ඉන්දියාවේ චෙන්නායි නුවර සිට ඉන්දීය ගුවන් සේවයේ ඒ.අයි.- 271 දරණ ගුවන් යානයෙන් කටුනායක ගුවන් තොටුපොළ වෙත පැමිණියා.

ඔවුන් පිළිගැනීම සඳහා ශ්‍රී ලංකා මලල ක්‍රීඩා ආයතනයේ නිලධාරීන් මෙන්ම මෙම ක්‍රීඩක ක්‍රීඩිකාවන් ඉගෙනුම ලබන පාසැල්වල ගුරුභවතුන් , සිසුන් , විදුහල්පතිවරුන් සහ එම සිසුන්ගේ දෙමාපියන් ද කටුනායක ගුවන් තොටුපොළ පරිශ්‍රය වෙත පැමිණ තිබුණා.