2008 – 2009 කාලයේදී දමිළ තරුණයන් 11 දෙනෙක් කොළඹදී පැහැරගෙන ගොස් අතුරුදන් කිරීම, රඳවා තබා කප්පම් ගැනීම යන චෝදනා යටතේ පවරා ඇති නඩුවේ දෙවැනි සැකකරු ලෙස නම් කර නීතිපති උපදෙස් මත මුදා හරින ලද හිටපු නාවික හමුදාපති, ත්රිවිධ හමුදා මාණ්ඩලික ප්රධානී රවීන්ද්ර විජේගුණරත්න සැකකරුවෙක් ලෙස නම් කරන ලෙස කොටුව මහේස්ත්රාත් පසන් අමරසේන මහතා අපරාධ පරීක්ෂණ දෙපාර්තමේන්තුවට නියෝග කළා.
අගතියට පත් පාර්ශ්වය වෙනුවෙන් කරුණු දක්වමින් නීතිඥ අචලා සෙනෙවිරත්න සිදු කළ ඉල්ලීමකට අදාළ නියෝගය ප්රකාශ කරමින් මහේස්ත්රාත්වරයා මෙම නියෝගය සිදු කළා.
ඒ අනුව ලබන ජුලි 27 වැනිදා අධිකරණය හමුවේ පෙනී සිටින ලෙස දන්වා සිතාසි නිකුත් කරන ලෙසද මහෙස්ත්රාත්වරයා නියෝග කරනු ලැබුවා.
නඩුව ඉකුත් අප්රේල් 30 දින කැඳවනු ලැබු අවස්ථාවේ දී පුර්වගාමී මහෙස්ත්රාත් ඉසුරු නෙත්තිකුමාර විසින් ද සැකකරුවකු ලෙස නම් කිරිමට නියෝග කළා.
එදින තවත් නියෝගයක් නිකුත් කරමින් සඳහන් කලේ සැකකරුට එරෙහාව චෝදනා ගොනු කර පැමිණිල්ල ඉදිරිපත් කරන ලෙසයි.
ඒ අනුව අද (10) චෝදනා පත්රය අධිකරණයට ඉදිරිපත් කෙරුණා.
“ඔහුට එරෙහිව පැහැදිලි සාක්ෂි ඉදිරිපත්ව සිටියදී වින්දිත පාර්ශ්වය ඉල්ලීම බැහැර කිරීමට බැහැ. සැකකරුට එරෙහිව ප්රමාණවත් සාක්ෂි තිබෙන බව පෙනී යනවා. එසේ සාක්ෂි තිබියදී නිදහස් කරන ලෙස උපදෙස් ලබා දීම යුක්තිය අපගමනය වීමක්” යැයිද මහේස්ත්රාත්වරයා කියා සිටියා.
“ලඝු නොවන විභාගයකදී නීතිපතිවරයාට බලයක් නැහැ මුදා හරින්න. බලය තිබෙන්නේ නීතිපතිවරයාට. නීතිපතිවරයා උපදෙස් ලබා දෙන්නේ අපරාධ පරීක්ෂණ දෙපාර්තමේන්තුවට. අපරාධ පරීක්ෂණ දෙපාර්තමේන්තුව විසින් එම කරුණු මහේස්ත්රාත්වරයා වෙත දැනුම් දුන් පසු එය අධ්යයනය කර අභිමතය අනුව සුදුසු නියෝගයක් සිදු කරනවා. නීතිපතිවරයාගේ උපදෙස් පිළිපැදීමට මහේස්ත්රාත්වරයා බැඳී නැහැ. යුක්තිය ඉටු කිරීමේදී නීතිපතිවරයාට විශාල වගකීමක් තිබෙනවා. සාක්ෂි තිබියදී නීතිපති උපදෙස් මත පූර්වගාමී විනිසුරුවරයා සැකකරු නිදහස් කිරීම දෝෂසහගතයි” බවද පෙර දිනයේ මහෙස්ත්රාත් ඉසුරු නෙත්තිකුමාර ද සිය නියෝගය ප්රකාශයට පත් කරමින් කියා සිටියා.
ඉදිරිපත්ව ඇති චෝදනාවලට අදාළව නව චෝදනා පත්රය සකස් කර, අද දින පැමිණිල්ල විසින් අධිකරණයට ඉදිරිපත් කළා.
නඩුව කැඳවූ අවස්ථාවේදී චෝදනා ගොනුකර ඇප මත මුදාහැර ඇති ලුතිනන් කමාන්ඩර් චන්දන ප්රසාද් හෙට්ටිආරච්චි සහ ගලගමගේ ලක්සිරි යන දෙදෙනා අධිකරණය හමුවේ පෙනී සිටියා.
