දූෂණ චෝදනාවක් සම්බන්ධයෙන් හිටපු බලශක්ති අමාත්‍ය කුමාර ජයකොඩි සියලු චෝදනාවලට තමා නිවරැදිකරු බවට විත්ති කුඩුවේ සිට ප්‍රකාශ කළා.
ඒ හිටපු අමාත්‍යවරයාට එරෙහිව අල්ලස් කොමිසම විසින් ගොනුකර ඇති නඩුවේ විභාගය අද (17) කොළඹ මහාධිකරණය හමුවේ ආරම්භ වු අවස්ථාවේ දීයි.
කොළඹ මහාධිකරණ විනිසුරු රශාන්ත ගොඩවෙල මහතා ඉදිරියේ නඩුව කැඳවනු ලැබුවා.
නඩු විභාගය ආරම්භ වීමට මත්තෙන් මහාධිකරණ විනිසුරුවරයා විමසා සිටියේ චෝදනා වලට වැරදිකරුද නිවරැදිකරුද යන්නයි. එහිදි විත්ති කුඩුවේ සිට හිටපු අමාත්‍යවරයා ප්‍රකාශ කලේ සියලු චෝදනා වට තමන් නිවරැදිකරු බවයි.
ඉන් අනතුරුව නඩු විභාගය ආරම්භ වුණා.
2016 වසරේදී ලංකා පොහොර සමාගමේ ප්‍රසම්පාදන කළමණාකරු වශයෙන් කටයුතු කරමින් සිටියදී පොහොර සමාගමේ ගබඩා පරිශ්‍රයේ කාපට් ඇතිරීමේ කොන්ත්‍රාත්තුව පෞද්ගලික සමාගමකට වාසියක් සැලසෙන ආකාරයට ප්‍රසම්පාදන කටයුතු සිදුකිරීම තුළින් රජයට රුපියල් 8,859,708/-ක පාඩුවක් කළ බවට චෝදනා කරමින් අල්ලස් කොමිසම විසින් හිටපු අමාත්‍යවරයාට එරෙහිව මෙම නඩුව ගොනුකර තිබෙනවා.
