අලුත් විකෘතිතා ඇති වීමත් සමඟම ශ්‍රී ලංකාවේ ” සුපිරි ඩෙල්ටා” ප්‍රභේදයක් බිහි වන්නේ දැයි සැකයක් මතුව තිබෙනවා.
ඒ අනුව මේ පිළිබඳව විශේෂ පරීක්ෂණයක් ඇරැඹූ බව ශ්‍රී ජයවර්ධනපුර විශ්වවිද්‍යාලයේ වෛද්‍ය පීඨයේ ආසාත්මිකතා, ප්‍රතිශක්තිවේද සහ සෛල ජෛව විද්‍යා අධ්‍යනාංශයේ ප්‍රධානී ආචාර්ය චන්දිම ජීවන්දර මහතා මහතා පවසනවා.
මේ අතර කොළඹ පුරා සියයට සියයක්ම පැතිරෙන්නේ ඩෙල්ටා ප්‍රභේදය බවට හඳුනාගෙන ඇතැයිද ඔහු ඊයේ පැවසුවා.
පිට පළාත් වලද යම් ආකාරයකට දරුණු ඩෙල්ටා කොරෝනා ප්‍රභේදය පැතිරීමට පටන් ගෙන ඇතැයි පැවසූ ජීවන්දර මහතා එන්නත්කරණ ක්‍රියාවලිය නිසා සැප්තැම්බර් මස අවසානය වනවිට රටට යම්කිසි සහනදායී තත්වයක් බලාපොරොත්තු විය හැකි බව වැඩිදුරටත් සඳහන් කළා.
මේ අතර නිරෝධායන ඇඳිරි නීතිය කඩකරන පුද්ගලයන් අත්අඩංගුවට ගෙන අධිකරණයට ඉදිරිපත් කිරීමෙන් පමණක් කොරෝනා පාලනය කළ නොහැකි බව පොලිස් මාධ්‍ය ප්‍රකාශක පොලිස් අධිකාරි නිහාල් තලදුව මහතා පවසයි.
එන්නත ගැනීම ප්‍රතික්ෂේප කරන පුද්ගලයන් පිළිබඳව ඉදිරියේදී දැඩි ක්‍රියාමාර්ග ගන්නා බවද ඔහු පැවසීය.
ඩෙල්ටා ප්‍රභේදය ඉතා භයානක බවත් එය වේගයෙන් පැතිරී යන බව ජනතාව තේරුම් ගත යුතු බවත් ඒ මහතා පැවසීය.
මෙය නවතා ගත හැක්කේ රටේ ජනතාවට පමණක් බව පැවසූ ඔහු ඒ නිසා අත්‍යවශ්‍ය කරුණකට හැරෙන්න නිවසින් එළියට නොබසින ලෙසද ඉල්ලා සිටියේය.
මුඛ ආවරණයක් නැතිව සිටින පුද්ගලයන් උසාවි දැම්මාට කොරෝනා පාලනය නොවන බවත් හැම දෙනාම ස්වයං විනයක් ඇති කර ගත යුතු බවත් විනය ගරුකව හැසිරිය යුතු බව ඔහු තවදුරටත් පැවසීය
