ඩුබායි සුද්දා අධිරණයේ දී වරද පිළිගනී

සංචාරක වීසා උපයෝගී කර ගනිමින්, ඩුබායි හා මෝල්ඩෝවා රටවල රැකියා ලබාදෙන බව පවසා මුදල් වංචා කිරීම හේතුවෙන් රක්ෂිත බන්ධනාගාර ගත කර සිටි රන්තැටිගේ නිශ්ශංක ප්‍රියදර්ශන නොහොත් ඩුබායි සුද්දා ඔහුට විරුද්ධව ඇති චෝදනාවලට වරද පිළිගෙන තිබෙනවා.

ඒ අදාළ නඩුව ජූනි 16වනදා කැදවූ අවස්ථාවේදීයි.

කුලියාපිටිය ප්‍රදේශයේ පුද්ගලයකුගෙන් රුපියල් ලක්ෂ 7ක් ලබාගෙන පොරොන්දු වූ පරිදි අදාළ රැකියා ලබානොදීම හා විදේශ රැකියා ලබාදීම සඳහා කාර්යාංශයේ වලංගු බලපත්‍රයක් නොමැති වීම ඔහුට ඇති චෝදනා වනවා.

ඒ අනුව අගතියට පත් පාර්ශවය වෙනුවෙන් රුපියල් ලක්ෂ 7ක මුදලක් අධිකරණයේ තැන්පත් කිරීමට කුලියාපිටිය මහේස්ත්‍රාත්වරයා විසින් නියෝග කළා.

මෙම නඩුව අගෝස්තු 25 වනදා නැවත කැදවීමට නියමිතයි.

ඩුබායි සුද්දාට විරුද්ධව මේ හා සමාන නඩුවක් වැලිසර අධිකරණයේදී ජූනි 26 දින ද කැඳවීමට නියමිතව තිබෙනවා.

කෙසේවෙතත් විදේශ සේවා නියුක්ති කාර්යාංශය මහජනතාවගෙන් ඉල්ලා සිටින්නේ මොහු විසින් සිදුකරන ලද මෙවන් විදේශ රැකියා සම්බන්ධ වංචාවන් ඇත්නම් ඒ පිළිබඳව කාර්යාංශයේ විශේෂ විමර්ශන අංශය වෙත පැමිණිලි කරන ලෙසයි.