ටෙස්ට් කණ්ඩායමේ නායකත්වය පිළිබඳව නැවත සලකා බලන ලෙස තමන් ශ්‍රී ලංකා ක්‍රිකට් තේරීම් කමිටුවෙන් ඉල්ලීමක් කළ බව ශ්‍රී ලංකා ටෙස්ට් නායක දිමුත් කරුණාරත්න පවසනවා.
අද මාධ්‍ය වෙත අදහස් දක්වමින් ඔහු අනාවරණ කළේ තමන් මීට පෙර මේ සම්බන්ධයෙන් ඉල්ලීමක් කළ නමුත් නායකත්වයේ දිගටම කටයුතු කරන ලෙස තේරීම් කමිටු නිලධාරීන් විසින් ඉල්ලා සිටි බවයි.
දැනට පැවැත්වෙන පාකිස්ථාන තරඟාවලියෙන් පසු නායකත්වය පිළිබඳ යළි සලකා බලන ලෙස තමන් නැවත වරක් තේරීම් කමිටු සාමාජිකයින්ගෙන් ඉල්ලා ඇති බව දිමුත් කරුණාරත්න ප්‍රකාශ කළා.
තම ඉතිරි ක්‍රීඩා කාලය තුළ පිතිකරුවෙකු ලෙස දස්කම් දැක්වීමට අවධානය යොමු කිරීමට කැමැත්තෙන් සිටින බවයි වත්මන් ටෙස්ට් නායකයා සඳහන් කළේ.
“නායකත්වයට වඩා සුදුසු ක්‍රීඩකයන් කිහිප දෙනෙක් ඉන්නවා. මම පෞද්ගලිකව දැකලා තියෙනවා සමහර ක්‍රීඩකයන් මේ වගකීම භාරගන්න දක්ෂ ක්‍රීඩකයන්. නව නායකයෙකු පත් කිරීමට තේරීම් කමිටුව එකඟ වන්නේ නම්, මම කැමැත්තෙන්ම නායකත්වය තෝරාගත් ක්‍රීඩකයාට භාර දෙන අතර කණ්ඩායමේ පිතිකරුවෙකු ලෙස මගේ කාර්යයන් ඉටු කිරීමට අවධානය යොමු කරනවා,” ඔහු වැඩිදුරටත් ප්‍රකාශ කළා.
ශ්‍රී ලංකාව මීළඟට ටෙස්ට් තරගයකට ක්‍රීඩා කිරීමට නියමිතව ඇත්තේ 2024 පෙබරවාරි මාසයේදී බව පෙන්වා දුන් ඔහු ප්‍රකාශ කළේ නව නායකයකු තෝරා ගැනීමට තේරීම් කමිටුවට ප්‍රමාණවත් කාලයක් තිබෙන බවයි.
දිමුත් කරුණාරත්න මේ බව කියා සිටියේ පාකිස්ථානය සමග අද පැවති පළමු ටෙස්ට් තරඟයේ පරාජයෙන් අනතුරුව මාධ්‍ය වෙත අදහස් දක්වමින්.
