ඥානසාර හිමි කුරානයට අපහාස කළ සිද්ධියේ නඩුව කැඳවයි

මීට වසර 14 පෙර කුරානය සම්බන්ධයෙන් කළ ප්‍රකාශයක් සමඟ ඉස්ලාම් දහමට අපහාසයක් සිදුකිරීම මඟින් ජාතික සමඟියට බාධා කිරීමේ චෝදනා ලබා සිටින බොදු බල සේනා සංවිධානයේ ලේකම් පූජ්‍ය ගලගොඩඅත්තේ ඥානසාර හිමියන්ට එරෙහිව නීතිපතිවරයා විසින් ගොනු කර තිබෙන නඩුව විභාග කිරීමට දින නියම කිරීම සඳහා එය ජුනි මස 26 වනදා කැඳවන ලෙස කොළඹ මහාධිකරණය නියම කළා.

මෙම නඩුව කැඳවූ අවස්ථාවේ දී විත්තිකාරය ඥානසාර හිමියන් අධිකරණය හමුවේ පෙනී සිටියා.

අද (01) දින පූර්ව නඩු විභාග සම්මන්ත්‍රණය අවසන් කළ මහාධිකරණ විනිසුරු බුද්ධික. සී. රාගල මහතා අනතුරුව එම නඩුව විභාගයට දින නියම කිරීම සඳහා ජුනි මස 26 වැනදා කැඳවන ලෙස නියම කළා.

පැමිණිල්ලේ පළවෙනි සාක්ෂිකරු අද දින අධිකරණය හමුවේ පෙනී සිටියා.

ඉදිරි නඩු දිනයේදී ද යළි අධිකරණය හමුවේ පෙනී සිටින ලෙස එම සාක්ෂිකරුට විනිසුරුවරයා අවවාද කළා.

මේවන විට මෙම නඩුවට අදාළ දැනට කොටුව මහෙස්ත්‍රාත් අධිකරණයේ ඇති මුලික නඩු ගොනුව හා සි.ඩි පටි යළි මහාධිකරණය හමුවේ කැඳවන ලෙසද නියෝග කරනු ලැබුවා.

මෙම සිද්ධිය සිදුවි දැනට වසර 14 ඉක්ම ගොස් ඇති බැවින් මෙම නඩුව ඉල්ලා අස් කර ගන්නා ලෙස නීතිපතිවරයාගෙන් ඉල්ලිමක් කරන බවද විත්තිකරු වෙනුවෙන් පෙනී සිටින ජ්‍යෙශ්ඨ නීතිඥ අශෝක වීරසිරි අධිකරණය හමුවේ ප්‍රකාශ කර සිටියා.