කොළඹ – නුවර ප්‍රධාන මාර්ගයේ හිඟුල ප්‍රදේශයේ දී අද (07) පෙරවරු 11.30 ට පමණ මාවනැල්ල ප්‍රදේශයේ සිට නුවර දෙසට ගිය සුඛෝපභෝගි ජීප් රථයක වේගය පාලනය කිරිමට නොහැකිව අසළ නවතා තිබූ ත්‍රී රෝද රථයක ද ගැටී පාරෙන් ඉවතට පැන අනතුරකට ලක් වී තිබුණා.
මෙම ජීප් රථයේ තරුණයන් පිරිසක් ගමන් කළ බවයි ප්‍රදේශවාසීන් පවසන්නේ.
ත්‍රීරෝද රථයේ සිටි වයස අවුරුද්දක පමණ කුඩා දරුවෙක් සහ තවත් දරුවෙක් ද තුවාල ලබා මාවනැල්ල මූලික රෝහලට ඇතුළත් කෙරුණා.
ජීප් රථයේ රියදුරු ද තුවාල ලබා රෝහල් ගත කර ඇති බවයි වාර්තා වන්නේ.
ත්‍රීරෝද රථයෙන් පැමිණි පිරිස මහනුවර, තලාතුඔය සිට අලුත් නුවර දේවාලයට ගොස් කුඩා දරුවා වෙනුවෙන් භාරයක් ඔප්පු කර නැවත පැමිණෙන අවස්ථාවේ මෙම අනතුරට මුහුණ දී තිබෙනවා.
මෙම අවස්ථාවේ දරුවන් දෙදෙනා පමණක් ත්‍රීරෝද රථයේ සිටි අතර වැඩිහිටියන් දෙපළ අසළ තිබූ කඩයකට ගොස් සිටි බවයි අප වාර්තාකරු පවසන්නේ.
මෙම අනතුර සම්බන්ධයෙන් මාවනැල්ල පොලිසියේ රථවාහන අංශය මගින් වැඩිදුර පරීක්ෂණ සිදුකරනවා.
