කම්කරුවන්ගේ අයිතිවාසිකම්, ගෞරවය සහ ජීවිත අරගලය සිහිපත් කරන ජාත්යන්තර කම්කරු දිනය හෙවත් මැයි දිනය අදට (01) යෙදී තිබෙනවා.
1886 වසරේ දී මැයි මාසයේ දී වැඩමුරය පැය 08කට සීමා කරන ලෙස ඉල්ලමින් චිකාගෝ නුවර කම්කරුවන් පිරිසක් සිදුකළ උද්ඝෝෂණයකට පොලීසිය එල්ල කළ ප්රහාරයකින් මියගිය කම්කරුවන් සිහිකරමින් සෑම වසරකම මැයි මස පළමු දින ලෝක කම්කරු දිනය සමරනු ලබනවා.
ශ්රී ලංකාවේ ප්රථම මැයි දින සැමරුම 1923 වසරේ දී ඒ.ඊ.ගුණසිංහ මහතාගේ මූලිකත්වයෙන් පවත්වා තිබුණා.
මේ අතර මෙවර මැයි දින සැමරුම් දේශපාලන පක්ෂ රැසක් රැළි සංවිධානය කර ඇති අතර, ජාතික ජන බලවේගයේ ප්රධාන මැයි දින සැමරුම ජනාධිපති අනුර කුමාර දිසානායකගේ ප්රධානත්වයෙන් මහරගම දී පැවැත්වීමට නියමිතයි.
එමෙන්ම දිවයින පුරා මැයි දින රැළි 21ක් ජාතික ජනබලවේගය මෙවර පැවැත්වීමට සැලසුම්කර තිබෙනවා.
මෙවර මැයි දින සැමරුම් බොහෝමයක් පැවැත්වෙන්නේ කොළඹ කේන්ද්ර කර ගනිමිනුයි.
ඒ අනුව සමගි ජනබලවේගය සිය මැයි දින රැළිය මාලිගාවත්ත පී.ඩී. සිරිසේන ක්රීඩාංගනයේදී පැවැත්වීමට කටයුතු සංවිධාන කර තිබෙනවා.
ශ්රී ලංකා නිදහස් පක්ෂ මැයි දින රැළිය බොරැල්ල කැම්බල් පිටියේ දී පැවැත්වීමට කටයුතු සූදානම් කර ඇති අතර, එය පස්වරු 2.00ට ආරම්භ කිරීමට නියමිතයි.
දියුණු ශ්රී ලංකාවක් වෙනුවෙන් මැයි හමුව, යන මැයෙන් සර්වජනබලයේ මැයි දින සැමරුම තිඹිරිගස්යාය හේන්ද්රි පේදිරිස් ක්රීඩාංගනයේ දී පැවැත්වීමටයි සැලසුම්කර ඇත්තේ.
මේ අතර ශ්රී ලංකා පොදුජන පෙරමුණ මැයි දිනය වෙනුවෙන් රැළියක් නොපවත්වන අතර, ඒ වෙනුවෙන් ටී.බී ඉලංගරත්න පිළිරුවට පුෂ්පෝපහාර දැක්වීම හා දිවයින පුරා ආගමික වැඩසටහන් සංවිධාන කර ඇති බවයි වාර්තා වුණේ.
මේ අතර මැයි දිනය නිමිත්තෙන් කොළඹ නගරය තුළ අද (01) විශේෂ රථවාහන සැලැස්මක් ක්රියාත්මක බව පොලිසිය සඳහන් කළා.
