පසුගිය 12 වනදා ජනාධිපතිවරයා සමඟ පැවැති සාකච්ඡාවේ සංස්කරණය නොකළ වීඩියෝ පටිගත කිරීම ලබාදෙන ලෙස ශ්‍රී ලංකා නීතිඥ සංගමය ජනාධිපති මාධ්‍ය ඒකකයෙන් ඉල්ලීමක් කර තිබෙනවා.
ශ්‍රී ලංකා නීතිඥ සංගමය ඊයේ (14) නිකුත් කර ඇති ලිපියකින් පෙන්වා දෙන්නේ, මේ වනවිට එම සාකච්ඡාවේ වීඩියෝ පටිගත කිරීමේ කොටසක් පමණක් තමන්වෙත ලැබී ඇති බවයි.
එම වීඩියෝ පටයෙන් ලබාදී ඇත්තේ මූලික සාකච්ඡාවේ කොටසක් පමණක් බවත්, ඇතැම් කොටස්වල ශබ්දය ද පැහැදිලි නොමැති බවත් එම සංගමය පෙන්වා දී තිබෙනවා.
ඒ, අනුව ජනාධිපතිවරයා සමඟ සිදුකළ සාකච්ඡාව පුරා සිදු වූ සියලු අදහස් දැක්වීම්, නිරීක්ෂණ, ප්‍රතිචාර සහ නීතිඥ සංගමයේ නියෝජිත පිරිස විසින් අවසානයේ සිදුකළ ප්‍රකාශ ඇතුළත් සම්පූර්ණ සංස්කරණය නොකළ වීඩියෝ පටිගත කිරීම ලබාදෙන ලෙසයි ඔවුන්ගේ ඉල්ලීම වී ඇත්තේ.
එමෙන්ම හැකි හොඳම ශව්‍ය සහ දෘෂ්‍ය තත්ත්වයෙන් අදාළ වීඩියෝව ලබාදෙන ලෙසට ද නීතිඥ සංගමය අදාළ ලිපිය මඟින් වැඩිදුරටත් ඉල්ලා තිබෙනවා.
