එක්සත් ලංකා පොදුජන පක්ෂයෙන් ජනාධිපතිවරණයට ඉදිරිපත්වීමට අවස්ථාවක් ලබාදීම සඳහා මහජන උපයෝගතා කොමිසමේ හිටපු සභාපති ජනක රත්නායකගෙන් රුපියල් කෝටි තුනක අල්ලසක් ලබාගත් බව කියන සිද්ධියත් සම්බන්ධයෙන් රක්ෂිත බන්ධනාගාරගත කර සිටි එම පක්ෂයේ සාමාජිකයන් දෙදෙනෙකු ඇප මත මුදා හරින ලෙස කොළඹ ප්‍රධාන මහේස්ත්‍රාත් තිළිණ ගමගේ ඊයේ (18) නියෝග කර තිබෙනවා.
එම පක්ෂයේ හිටපු ලේකම්වරයකු වන 2015 ජනාධිපතිවරණයට එම පක්ෂයෙන් ඉදිරිපත් වූ රුවන්තිලක පේදුරුආරච්චි හා එම පක්ෂයේ සාමාජිකයකු වන නිහාල් ප්‍රේමකුමාර යන සැකකරුවන් දෙදෙනා රුපියල් පනස් දහසක මුදල් හා රුපියල් ලක්ෂ දහයක් වටිනා ශරීර ඇප දෙකක් මත එසේ මුදාහැරීමට නියම කෙරුණා.
මෙම සිද්ධිය සම්බන්ධයෙන් අල්ලස් හෝ දූෂණ විමර්ශන කොමිසම සැකකාරියක් ඇතුලු අට දෙනෙකු අත්අඩංගුවට ගෙන අධිකරණයට ඉදිරිපත් කළ අතර ඉහත සඳහන් කළ සැකකරුවන් දෙදෙනා හැර සෙසු සැකකරුවන් රුපියල් ලක්ෂ 20 බැගින්වූ ශරීර ඇප මත මීට පෙර නඩු වාරයේදී මුදා හැර තිබුණා.
එම පක්ෂයේ නිත්‍ය ලේකම් මාර්ටින් සරත්චන්ද්‍ර, කෘත්‍යාධිකාරී මණ්ඩලයේ සාමාජිකයන් වන රංගන කුමාර, චන්දන සුගත්,නිල්මිණී පුෂ්පකුමාරි ඇතුළු සැකකරුවන් හය දෙනකු එසේ ඇප මත මුදා හැරීමට නියම කළා.
ඉදිරි ජනාධිපතිවරණයට (2024) ඉදිරිපත්වීම සඳහා පෙරේදා (14) ඇප මුදල් තැන්පත් කළ මහජන උපයෝගිතා කොමිසමේ හිටපු සභාපති ජනක රත්නායක අල්ලස් හෝ දූෂණ විමර්ශන කොමිසම වෙත කරන ලද පැමිණිල්ලක් අනුව සැකකරුවන් අට දෙනා අත්අඩංගුවට ගෙන අධිකරණය වෙත ඉදිරිපත් කර තිබුණා.
එම අල්ලස් මුදල ලබාදීම සඳහා වැලිකඩ ප්ලාසා සාප්පු සංකීර්ණයට පැමිණෙන ලෙසට සැකකරුවන් පිරිස ජනක රත්නායකට දැනුම් දී ඇති බවත් ඒ අනුව රත්නායක මහතා එම ස්ථානයට ගොස් අදාළ අල්ලස් මුදල් සැකකරුවන්ට ලබාදීමට උත්සාහ ගත් අවස්ථාවේ දී අල්ලස් කොමිසමේ නිලධාරීන් විසින් සැකකරුවන් පිරිස අත්අඩංගුවට ගෙන ඇති බවද එම විමර්ශන නිලධාරීන් අධිකරණයට දැක්වූ කරුණුවලින් හෙළි වී තිබෙනවා.
